Yitachu-i Naga nunger dang pei tesem renloktsü ayongzük

February 3 nü Meluri sub-division kübok Shilloi Lake, Lütsam yimtsüng nung yartsüngsangertemi Minister Yitachu pela agizükdang agiba noksa angur.

Dimapur, March 4 (TYO) : Naga nungertemi pei aliba tesem renlokdaktsütsü aser itemji tanüngba Naga nunger den lemsateptsü merangtsüla, ta School Education & SCERT Minister, Yitachu-i ashi.
Shilloi Lake, Lütsam nung Phokhungri Area Cultural Society (PACS) indang 5 buba Cultural Festival nung tongti tesemdanger o jembidang Yitachu-i iba onük jembi.
“Asenoki Naga nunger tsüngda telongjem aginüba ama madokdaktsüra, kecha majangzüktsü” ta Yitachu-isa ashi.
Pochury tesem nung power generation aser industry tsütsü terenlok mapa aika inyaktettsüsa lir. Anungji Meluri sub-division nung alirtemi sorkar den yaritepa Hydro Electric Project tem inyaktsü atema mapa inyaktsüla, ta paisa ayongzük.
Ibaji ajanga sen ajangzüktsü aser tesem nung rongsenren jenjang ajungtsü, ta tongti tesemdangerisa shisem.
Iba tesem nung alirtemi bendanger dang ali mayoktsü atema telemtetba agia lir aser iba atema teilemtsü abener. Kechiyong tangalen nungi nisungtem arua mapa meinyakra terenlok malitsü. Anungji nübortemi tangar nem pei li agütsütsüla aser iba jagidang tangartem temulung ulua arua industry mapa aser terenlok mapa balala inyaktettsü. Iba nungji rural tourism densema lir, ta Yitachu-isa metetdaktsü.
NPF sorkari tesüiba küm 13 tsüngda mapa aika inyakogo saka tanga tebilemtsü khuret tulutibaji Myanmar den gari lenmang agi sendakteptsüba lir. Ibaji yanglutetba ajanga tanga Southeast Asian linüktem den shishilembaba, sobaliba aser tourism maparen jenti inyaktettsü, ta paisa ashi.
Sorkari Shilloi Lake nung yanglua aliba ground nung teti atema kiojen ka yanglutsü aser ibaji International Cultural Hub ka kümdaktsütsü merangtsü, ta Yitachu-isa metetdaktsü.
Iba sentong nung Pochury Hoho tir, Penthü Pochury-ia o jembidang, nübortem dang Tsüngrem tenüng nung longjemtsü aser maparen tejakleni bener aotsü atema ayongzük.
Sentong nung PACS vice president K. Tsathvü-i tesentepertem pela agizük aser PACS president Thimu Feedhu-i tir o jembi.
Anogo asemnü benjungmung nung sobaliba dak sendakba shilemtem aser yartsüngsangtem agitsü aser benjung asoshi tenlartemji Phokhungri EAC James Renbi Kikon, 20th Meluri A/C president T. Kamsang, APO RD Block Meluri K. Asetsü aser Deychamthvii Pethüry nungertem lir aser benjung shibangba sentong nung tongti tesemdangerji General Secretary & Assistant PRO & Nodal officer to ECI NPF Central, S. Akho Leyri asütsü.
Phokhungri Area Cultural Society (PACS)-i ayongzüka amungba benjung nung adenertemji Meluri sub-division kübok yim 11 – Zhipu, Mokie, Washelo, Old Thewati, New Thewati, Lütsam, Phokhungri Village, Phokhungri Town, Avakhung, Laruri aser Sütsü nungertem lir.