Yitachu-i Naga nunger longjemtsü nüngdakba indang jembi

Kohima, Oct 15 (TYO) : Nagaland state ya yimjung nung tejakleni renloka aotsü atema Naga nunger longjemtsü nüngdaker, anungji kaketshirtemi Naga nunger telongjem asoshi inyaktsüla ta School Education minister, Wb.Yitachui metetdaktsü.
“Naga nungertem dak pei ajungtsü asoshi dang bilemba shisatsü agi sünga lir, iba jagi Naga kin rongnung longjema melitetter, iba ama bilemba shisatsüji asenok dak nungi moudaktsüra, asenok asoshi tarutsü anogotem mejungi angur,” ta Yitachu-isa metetdaktsü.
Pai iba o ya Kohima Science College (Autonomous) Jotsoma nung 54 buba Win-Fest sentong nung jembidang metetdaktsü.
Asenok rongnung telongjem melira temeimtep malitsü aser shingaia ochi mejembitsü, telongjem melira Naga nunger loktiliba nung terenlok aser yimjiyimjung malitsü ta paisa ashi.
Tamalenbo Naga nungertem ya tekolak bushiba kin liasü, anungji kin kidong aser yimtsüng balala tsüngda tsükchitepa raratep, ajisüaka tangbo item ajakji anenadokogo, saka pei kin longjemtsü bilemba dak alaka Naga nunger ajak longjemtsü asoshibo aikati bilema meinyaker ta Yitachu-isa ashi.
Aji oda, Naga nunger rongnung telongjem maliba agi, Naga yimten tebilemtsü ken o tatem küma latettsü asoshia timatemer aser arogoi dena ochi jembitsü memulunger ta paisa ashi.
Iba ama mapang ka nung Naga nunger kaketshirtemi pei kin alema oagi Naga kintem ajak ka küma longjemer alitsü asoshi bilemtsüla aser Naga nunger yimjiyimjung nung alitsü asoshi inyaktsüla ta Yitachuisa kaketshirtem ayongzük.
” Longjemtsüba yabo loktiliba onük asünungji yimten pangzüng agibo makoktsü, anungji senso shiai Naga nunger telongjem asoshi inyaktsüla,” ta paisa ashi.
Nagaland ya tamajung nung dang tematiba jenjang nung aliba asoshi jashiba ken o ka lemsatepdang, ” Nagaland ya HIV/AIDS tashidak agi timatemba nung tanga state-tem dang nungi jenjang temaba nung lir aser sorkar mapa inyakertem aliba maparen nunga state ajak dang nungi tematiba jenjang nung lir. Iba ama tamajung nung renlokba jenjang agi Naga nunger loktiliba menentsür ta Yitachuisa metetdaktsü.
Nagaland state nung yimten inyakyim shitak alitsü nüngdakba indang ashidang, yimten nung inyakyim kecha melii kümra loktiliba timatemtsü, anungji sorkar laoka yimten nung inyakyimbo melaodaktsütsüla ta paisa ashi.
Win-Fest sentong ya anogo pongo nü alir aser iba tenzükba sentong nung Ringhuila Zimik menden liasü aser KSCJ Evangelical Union nung tadong tir, Mhaden den sarasadem. Iba kasa sentong nung adenertem ajak pelaa agizükba o tongti zülur Melite Wetsa-i jembi aser Liavirhü Movi & medemertemi sobaliba ken ka aten. Iba denji ano Imonenla Jamir-ia ken tajung ka tena liasü. Games & Sports secretary Kholi Chachei-i shilem agir telok pongo tenangzükba agidaktsü aser Assistant general secretary Mulai L-i tepela o metetdaktsü.