Yitachu-i Pochury nunger dang state sorkar den yariteptsü ayongzük

Kohima, April 3 (TYO) : Nagaland nung rongsen timba aliba tesemji Phek district kübok Meluri sub-division lir, anungji iba tesem nung alirtemi Naga nunger tejakleni aotsü atema inyakba mapa nung sorkar den yariteptsüla, ta School Education & SCERT Minister, Yitachu-i ayongzük.
“Asenok ya tongtipang tesem ka kibur lir aser tanga Naga nunger yaritsü atema shisadangtsü mapang tongja tongogo” ta yashi Meluri Town Council tenzükba sentong nung Yitachu-i ashi.
Iba tesem nungi Nagaland nung power peria adokdaktsütettsü aser ano ali rongsen aika lir. Anungji iba tesem nung alirtemi industry tsütsü inloktsü atema power generation maparen pusema nungittsü ayongzüker, ta Meluri nungi MLA ka ama Yitachu-i ashi.
Meluri sub-division kübok Avakhung yimtsüng ajanga India aser Myanmar tsüngda International Trade route lapokba sülen, South East Asian den kishi lapoktsü. Ibaji ajanga Meluri tesem ya shishilembadak aser industry mapa inyakdak tongti tesem ka akümtsü, ta paisa metetdaktsü.
Iba dak sendakba nung iba tesem nung alirtemi sorkari mineral industry atema mapa inyakba nung timtem magütsütsüla aser ibaji ajanga Naga nunger tejakleni aotsü, aser Centre nungi sen aruba dak dang metaloker melii Nagaland state-ia sen peria ngutettsü, ta Minister Yitachu-isa shisem.
Yitachu-isa Chief Minister TR Zeliang dang Meluri jila jenjang nung ajungketba atema pelaba metetdaktsü.
TR Zeliang ji tasütait Chief Minister ka lir aser senotsü mongui timtemba mapang ajuruaka pai Nagaland state kanga junga ketdang asü. Nagaland nung iba ama senotsü timtem tulu ajuruaka TR Zeliang-i sorkar mapa inyaker nem itasen magütsütettsüsa tensa majurudaktsü ta Yitachu-isa ashi.