Yitachu-i pre-primary jenjang nung temulung agütsütsü ayongzük

Kohima, August 13 (TYO) : School Education & SCERT Minister, Yitachu-i tanü tesayurtem dang mapa nendaka inyaktsü aser pre-primary jenjang nungi kaketshirtem kanga junga anitettsü atema tayongzükba agütsü.
Modern Institute of Teacher Education (MITE) Kohima nung 4 buba Graduation Day sentong nung o jembidang, Yitachu-i ashiba agi, “Nagaland nung education system ji middle school tem aser temaba jenjang dak dang tongti süa rangloker, saka tamendakdak tajung melira tajangzük kecha malitsü. Anungji pre-primary jenjang asoshi kanga süoki ia bilemtsüla.”
“Sorkar school tem nung tesayur takotettem aika liaka kaketshirtemi nija school tem nunga züngnür aser iba asoshi kanga sasa bilemer. Tesayurtemi pei mapa nendaka aser bendanga agüja inyaktsüla,” ta Yitachu-isa ashi.
“Sorkar school tem nung kaketshirtem lakh 2 shi ka lir aser parnok timi mesayutetra, yimjung aser külemi longjema alitsü tensa meyanglutettsü. Tesayurtemi meta talangka pila orr aliba tesem nunga mapa inyaktsü mulungtettsüla, aser aji asü nungdang sensaksertem rongnunga sensaktiba aser tangar menenepertem yaritettsü,” ta paisa ayongzük.
Minister Yitachu-i B. Ed graduate asür nem tenüngsang agütsü aser paisa ashiba agi, sorkari tesayurtem atema B. Ed compulsory kümdaktsü aser tawa Teachers Eligibility Test nunga B. Ed qualification alirtem dang shilem agidaktsü.
Tang teinydakdak sorkar school tesayurtem shilem lemsar B. Ed training agir aser ano parnok 14,000 shi ka agitsü anünga lir. Tang teinyakdak tesayurtemi B. Ed qualification angutsüla aser ibaji parnok annual increments aser promotions atema kanga tongtipang lir. Nagaland state nung tesayurtem ajak B. Ed qualification angurtem dang asütsü mapang ka arutsü menua mali, ta Yitachu-isa shisem.
Küm shia tesayur 200-300 shi ka mapa nungi anisüngzüker aser iba atema Department-i state sorkar dang tesayurtem aniokba mapa noktanga aliba lapoktsü atema onük benogo. Cabinet-i iba onük agizükba sülen tim masüba inyakyim kecha medendaktsüi B. Ed azüngertem tesayur shimtsü, ta paisa metetdaktsü.
Tanü sentong nung MITE Managing Director, Pelee Hekha-ia o jembidang, candidate 96 nungi 84-i B. Ed exam 2015 nung takok angu aser Nagaland nung pass percentage tajungtiba iba college ajanga angu, ta ashi.
Iba college ajanga 88% pass ercentage angu aser Arenmenla Jamir-i Top-10 nung menden 4 buba takok angu, ta Pelee Hekha-isa shisem.
Sentong nung Thungyani M. Erui-i temoatsü meshia sarasadem, 2016-18 batch training agirtemi ken ka aten, Batch 2015-17 training agirtemi sobaliba tsüngsang ka ai aser Manyei Kuhmeishu-i tenüngsang agüja sarasadem.