Yitachu-i School Education Department ajungkettsü ayongzük

April 12, 2017 nü Capital Convention Centre, Kohima nung School Education Department conference nung School Education & SCERT Minister, Yitachu-i o jembidang agiba noksa angur.

Kohima, April 12 (TYO): School Education & SCERT Minister, Yitachu-i tanü School Education Department nung ketdangsertem dang department indang tenüng tajung tanaben meyipa bener arutsü atema longjemer mapa inyaktsü ayongzük.
“Tim masüba onük aika atema Nagaland tetshir aser onüktem rongnung School Education Department indang dena lir. Sorkar school tem dang nungi nija school tem nung kaketshir teimba aliba, tesayur-tanur medemdangba kanga meputepba aser result tamajung angubatem atema tangari asenok tetshir” ta Yitachu-isa ashi.
Nagaland nung nütsüng yongsük den medemdangra asen state nung school teimba lapoka lir saka züngtor anenertem asadangra linük nung asen state nung teimba lir, ta paisa shisem.
Bodbarnü Capital Convention Centre, Kohima nung School Education Department kübok District Education Officers (DEO), Deputy DEO, Sub-Divisional Education Officers, Junior Education Officers, Deputy Directors aser Assistant Directors indang sentong ka alidang Yitachu-i iba o jembi.
Shisaluyimba maparen nung temulung magütsüra, ibaji ajanga loktiliba samatsü aser terenlok malitsü. Iba asoshi department nung ketdangsertem aser tesayurtemi maneni angazüktsüla aser kaket shisatsü bushiba süoki ia bilemtsüla, ta paisa ayongzük.
Nagaland nung sorkar aser nija school tem nung Class-2 kaketshir 49,480 tenüng züluoker. Ajisüaka, Class 9 tashi nung kaketshir 13,000 den teimba züngtor anener aser Class 10 o 12 atongdangbo parnok tesadang ka züngtor anener. Anungji, asenoki kaketshirtem school züngtor anenba ya khuret ya azüoktsüla, ta Minister Yitachu-isa ashi.
Nagaland nung 7th ROP mapa küma inyaktsü atema sen crore 954 nüngdaker saka state sorkar teka nung sen crore 580 dang liaka tasü itta ROP tenzüktsü atema telemtetba agiogo. Anungji, sen amajok nung endokba aser ozüng alema nisung shimokba inyakyimtem anentsüla, ta paisa ayongzük.
Department nung ketdangsertem mapa nung jenjang atuba indang onük atema jembidang, Yitachu-i “ketdangsertemi nenok tsüngda obang meputepi toktepba anentsüla aser katika yaria tejakleni aotsü merangtsüla. Nenoki rara manenra aser nenok sasep nung promotion sota yutepra, künü anogo department nung mapa inyaktsü ketdangser ka danga mali akümtsü” ta ashi.
“Nenok ajak külemi amalitepa mapa inyakang aser taoba mapang ajaki akhümtsübuba department ka ama, iba tenüng tajung meyipa bener arutsü merangang” ta paisa mepishia metetdaktsü.
School Education & SCERT Minister-isa, “Nagaland kübok Additional Deputy Commissioner Head Quarters ajak nung examination centres lapoktsü atema department-i sentong yangludar,” ta metetdaktsü.
Tanü sentong nung Commissioner & Secretary of Department, F P Solo-ia Directorate aser field officers tsüngda amalitep aser sensaksem alitsü ayongzük.
Sentong nung mendenji Additional Director I. Satemmenla liasü, Joint Director Vikieno Savino-i temoatsü meshia sarasadem aser Additional Director (HoD) Wonthungo Tsopoe-i tesentepertem pela agizük.
Associate Prof. SCERT, Dr. Zavise Rume-i “Importance of counselling and career guidance in schools” aser Consultant School Education, G. Kevishe Phucho-i “Office management, office procedures and rules” onüktem nung technical session agi.