Yitachu-i Sü metsüba maparen ajungkettsü ayongzük

Dimapur, June 2 (TYO): School Education & SCERT Minister, Yitachu-i Nagaland nung Sü metsüba dak sendakba sentongtem atongtsü aser nisungtemi sü metsütsü ayongzük.
Mithun atema Indian Council of Agricultural Research-National Reasearch Centre (ICAR-NRC) 27 buba Foundation Day nung o jembidang, Yitachi-i ashiba agi, “Sü ya akhüm taket aser temeimtsü aketba shiruru ka lir aser iba shiruru ya Naga nunger den akhidang nungi sendaktepa lir. Iba shiruru ya kibong aser yimtsüngtem tsüngda khurettem bentettsü atema amshi.”
State Veterinary & Animal Husbandry Department kübok Sü metsütsü senotsü agüjaka Sü metsüba ajanga rongsenkettsüng tsütsü temelenshi kecha balaka mali. Iba ya sorkar aser shiruru metsürtem tsüngda tesentaktep tajung maliba ajanga lir, ta paisa ashi.
Sorkari shiruru metsür nem agütsüba incentives/subsidies ji Sü metsürtem masü saka tangari ang agizüka agir. ajisüaka, sü atema ICAR-NRC aliba ajanga asen state nung sü metsüba jenjang tajungba aser tuluba akümtsü teimla lir. Institute, sorkar aser sü metsürtem tsüngda tesentaktep tajung ali nungdang rongsenkettsüng tsütsü temelenshi adoktsü. ICAR-NRC Jharnapani-i shiruru metsür nem sentotsü teyari agütsüba dang masü saka osangtsüsang agütsüba den shiruru metsürtem yaritsüla, ta Minister-isa shisem.
Yitachu-isa, shiruru metsürtem dang ICAR-NRC Jharnapani ajanga senotsü teyari anguba atema dang masü saka teyari anguba nungi talila bendenloka reju ajungkettsü atema inyaktsüla, ta ayongzük.
ICAR-NCR on Mithun Director, Abhijit Mitra-i o jembidang, Nagaland nung Sü metsüba ajanga nübortem taküm jenjang melenshitsü teinyaktsü wadang tulu lir, ta ashi.
Sü metsürtem nem loan agütsütsü atema Institute-i bank tem dang asüngdangogo aser ano Dimapur Airport nung Sü kürakyanglu ka yanglutsü, ta Mitra-isa ashi.
Nagaland nung sü metsütsü ayongzüktsü atema ICAR-NRC-i slogan, essay aser drawing competition tem ayongzüka agitsü, ta paisa shise.
Iba anogomung nüngtem nung staff tajungtem nem sempet agütsü, temeket aliba yimtsüngtem nem süngdong agütsü aser Medziphema yimtsüng nem semi-intensive rearing atema Sü pungu agütsü.