YOC nung tantsür tamburtem atema sentong ayongzük

Dimapur, July 08 (TYO) : Youth Oasis Centre, Dimapur nung July 4 nungi 6 tashi tantsür tambur arishi küm 60 nungi temapurtem asoshi sentong tajung ka Tribal Old Age Care Centre ajanga ayongzüka liogo. Iba sentong nung Misisonary Wb.Sungit tongti o jembir liasü aser pa den Temsüla, M.Ritsala aser S.Ayangla Jamir nungertemi yaritepa liasü.
Iba sentong nung adenertem dang tanüla jenjang tajungba renemshitsü nüngdakba den pei chirnur aser semchirsemnurtem den tesendaktep tajung nung alitsü asoshi tesayuba tajung agüja liasü.
Iba sentong nung parnok ajak agi 79 aden aser parnok rongnung tambutisangji arishi küm 87 aser tantsütilaji arishi küm 85 liasü. Parnok ajak kanga temoatsü ngua adenba kuli sütepa liasü.
Iba sentong ayongzüker Tribal Old Age Care Center nung ketdangsertemi iba sentong takok ngua katettsüsa nübo, rongsen, shisatsü aser sarasadem agi yarirtem ajak dang kanga pelaba metetdaktsüogo.