Yoga ajanga jenjang atuba khuret pungbatsü asü: Shiv Sena

Mumbai, June 23 (Agencies): Ato kilonser, Narendra Modi aija Brihostibarnü Shiv Sena-i, alima sabang nung yoga ajungkettsüba atema tenüngsang agütsütsü tetemsü, ajisüaka yoga exercise ajanga osettsüset nung jenjang atuba khuret ajema akumtsü asü, ta asüngdang.

“Linük 130 nem yoga idaktsüba atema Ato kilonser, Narendra Modi tenüng asangtsü tetemsü. Yoga ajanga Modi-i linük 130 ali nung mejangdaktsüogo,” ta Shiv Sena-i ashi.

“Tang asenoki nüngdakbaji, Pakistan teti atema mejangdaktsütsüla. Iba ya raraba osettem teyari ajanga dang ataloktsü. Pakistan-i teti atema ‘Shavaasan’ (tasümang ama mejangba yoga position) benshitsü nüngdak,” ta Shiv Sena-i par osangkaket ‘Samaana’ yimobilem ajanga ashi.

Parnokisa, BJP masüba state chief minister temibo Modi anemtsüa akok, ajisüaka yoga ya science ka lir aser iba ya manemtsüla, ta ashi.

“Yoga ajanga aika ajangzüktsü. Ajisüaka yoga ajanga osettsüset nung jenjang atuba aser ochimashi ajema akumba nung yaritsü asü (?) Iba atema telangzüba agütsüra kanga junger asütsü,” ta Sena-i ashi.

Yaküm United Nations-i June 21 ya International Yoga Day asütsü ta sangdonga liasü.

Taküm tanabuba International Yoga Day nung India aser bendang linüktem nung nisung lakh aikati yoga shilem agia liasü.

Shiv Sena ya Maharashtra aser Centre na nung BJP den teloktep party ka lir, ajisüaka parnoki mapang shia BJP aser Modi sorkar aija arur.

Modi-i bendanglen India nung ochimashi jenti lir ta jembiba anema tawa Sena-i pa aija liasü.

Sena-isa, BJP-i yimsüsüba state tem- Maharashtra, Madhya Pradesh aser Gujarat nung ochimashi tatalokbatemji-a Gandhi’er kibong tai ajanga asü (?), ta BJP aija liasü.