Yoga aser Khristan tebilemtsü

~ Dr. R. Sashikaba Kechutzar, Asso. Prof. ETC, Jorhat.

(Iba ocet ya Dimapur Ao Baptist Arogoi adokba Tongtepratep July – December 2018 adok nung adokba lepshia adoktsür).

Alima kanga kara tejakleni aoba mapang ka nung tanü asenok alir. Iba amala tensa mapang den putepa alitsü merangdang, takum liba-liro, sobaliba, chia-ajemba aser tsürabur nungi benshia aruba inyakyim aika nung temelenshi aika adokba angur. Aser item temelenshi den sendakba maparen tasen rongnung ‘yoga’ ya ka lir, koba alima tesem ajak nung meimchir ajongai metetba inyakyim ka tanuba kümogo. Kechiba ta suraprangla, yoga tesayurtemi ashibaji, yoga anogo shia benshira asen temang anema aliba den külemi ana temang nunga wakshi-waklem meli-i süsümedema tebur junga alitsü ta tesayuba agutsür. June 21, 2015 nungi tenzüka asen Prime Minister, Narendra Modi-i anir tanü alima ajonga nung ‘Intemational Day of Yoga’ ta atakzüka amonger. India nung balaka school ajonga nung Yoga class ozüngsüa agidaktsür. Anungji tanü alima ajak nung yoga tajangzük indang jembimesogo.
Swami Vivekananda-i 1893 nungi tenzüka America nung yoga indang tesayuba aser tajangzük indang sayu. Ano maneni pa sülena yoga tesayur balala oagi iba indang kanga sabua sayua aru. Asen lima, India nungbo yoga ya tar nunger putu nungi benshia aruba inyakyim ka lir aser tanü-asüngbo ano TV nung dena iba tesayuba sentong jenti telecast asüba angur. Talisa, küm ishika tejaklen nungi tenzüka India nunger aika yoga guru Baba Ramdev den külemi anogo shia yoga agiba TV nung angur, aser ni bilemer asen khristan pur-a aika pa den yoga anogo shia agia alitsü südi. Kodang Modi sorkari 2015 nung iba yoga India lima ajonga nung benshitsü tayongzükba agutsü, khristan pur kari iba ya Hindu nunger tamangba tesayuba anungji ibai kenyongi mebenshitsüla ta jembi saka ano karibo iba ya physical exercise ka dang, anungji yoga practice asüba dangbo kecha tai/temenen mali ta jembir. Anungji tanü ni iba ocet nung yoga koda tenzük, koda benshia aru aser pa nükjidongji kechi, iba indang tatsü agi shisadanger.
Yoga Tetezü : Yoga ya Sanskrit ojang ‘yuj nungi anü aser iba tetezü ‘süngra nung alenlokba’ or ‘telongjem’ (yoking together or union). Anungji yoga tesayuba aser inyakyim ajanga meimchir tanela (nula) aser Tsüngrem nula (universal self – god) kenyongi longjemdaktsür. Hindu tesayuba nung meimchiri iba telongjem mangatet tashi aser shi talenba nungi (bondage to the body) mesala tashi pa soli-süli (rebirth) ta ojen aotsü ta ashir. Anungji Hindu tesayuba nung shi nung alena alibaji (bondage to the body) pei temenen agi masü saka pai pei chichiba nulaji (soul) memetetba ajanga lir ta ashir (ignorance of his/her true selflbeing which is divine). Iba jagi asenok meimchiri pei tejangraba ajak inyaker aser iba jagi pa/la shi nung maneni alenloka alir (Bondage to the body and ultimately lead to the process of birth and re-birth). Anungji iba talenba nungi adoktsü/salatsü asoshiji asen tekolok nung tebilemba, shi tejangraba aser rongsen penbuba, item ajak pongdoktsüla aser ibaji yoga ajanga inyaktet ta ashir. Aji asü nung Hindu nunger sadhu aser ascetics-temi (alima yimya nungi pilaa aliba telok) kümsa küm timtem-tuoshia (rigorous asceticism) jenti arema par tsüngrem den ka küma longjemtsü asoshi arem min, tenem aser moabo nung yoga benshia meditate asür (anembongba). Hindu yimsü nung tsüngrem den ka küma longjemtsü asoshi lenmang tongtibang asem lir (three ways or path) itemji yamai: mapa tajung inyakba lenmang (a path of disinterested service or desireless service – Karma marga), bendanga agüja külemba lenmang (a path of devotion – bhakti marga) aser tatemsa, chichiba temetetba lenmang (a path of true knowledge -Jnana marga). Item lenmang asem tatsü agi melemsadang Hindu nunger tekümtet (freedom or liberation or salvation) indang tera rasaa shinur. Khristan asoshi tekümtetji Kotak ajangzükbaji lir (Heavenly life or etemal life) saka Hindu nunger asoshibo tekümtetji pei nüla shi talenba nungi salabaji lir, koba soli-suli ta asüba nungi anener tsüngrem den ka klima longjemba ajanga ajangzükteter. Parnoki tekümtet dang ‘moksa’ ta ajar aser aji sür (death) külen dang masü saka taküm alidang-a angutsü akok ta ashir, Aser par asoshibo tekümter anguba takum ka jagi tatsük-temekong, yaa-tsüra, sübo-mesübo, talidak ali-mali, yamala mesükba tebilemba kecha meli-i tangari angati agutsüba chiyongtsü chia taküm süitema alir (a sanyasin is someone who is completely detached from the world – a realized soul or a renunciantj). Tetezü, alima nung alir saka alima shi tejangraba aser taginüba kecha makai litetba taküm. Aser iba amala jenjang tongteterji soll-süli ta asuba taküm nungi anenadoker. Saka iba jenjangji taküm ka (one single life) kisüng nung dangbo mangur; iba tekümtet jenjang angutsü atemaji nisung ka nülaji (soul) soli-suli ta asuba taküm balala aika nung jajarang tongteter (a series of birth and re-birth or transmigration of soul).
Tekümtet lenmang asem : Mapa tajung inyakba ajanga tekümtet lenmang (karma yoga): Kodang mapa tajung ta südir iba ya meimchir meima-anepaluba, shiruru meima-anepaluba, meshimetsür nem chiyongtsü agutsüba, tenIa ki asoshi rongsen agütsüba, temeshi jaka/temple-i oa külemba (pilgrimage to holy places), lokti timtem mapang nung rongsen aser nübu agi yariba, etc., Aser item mapa ya konang nüngsang, taa mesüra sempet angutsü atema masü saka inyaktsü tim ta tangatetba nung inyakba mapa (Disinterested service or services for the sake of service). Iba ya tejangjaba nung angatettsü atema Hindu lokti telemsa pezü indang tera shisemer.
Hindu nunger lokti ya pezüsü küma lemsaa lir aser item rongnung brahmin ya putir kin, khastriyas ya chuba aser nübur wazüka ayuba kin, vaisyas ya shishilembar aser aluyimer kin aser shudra ya mapa inyaker kin (labourer). Lokti nung koda lemsa ali iba amaji parnok inyakyim maparenjia lemdanga lir. Brahmin kati kodanga shudra ka indang mapa inyaktsü makok mesüra shudra kati brahmin ka mapa inyaktsü makok. Hindu tesayuba nung parnok kin den sendakba mapaji ochishia inyakba ajanga dang nisung ka taküm soli-süli ta jaja dang jenjang tajungba alangzüktsü (tetezü shudra kaji brahmin mesüra vaishyas kin nung asotsü akok). Anungji par yimsü nungbo mapa tajung inyakba ya tekümtet lenmang rongnung lenmang tongtibang ka. Aser mapa tajung inyakba ajanga soli-süli ta asüdang jenjang tajungba ka nung asotsü.
Bendanga aguja külemba lenmang (a path of devotion or bhakti marga): Bendanga agüja külemba ta asüba ya taküm bendanga agütsüba dang nungi kanga agi tarokba lir. Iba ya engraji oshi nung ‘a loving devotion’ ta asütsüba ya lir, tsüngrem temeim nung arembanga aliba (drowning in the love of God), mesüra khenyongi taküm rangben bendanga agütsüba. Inyaksangshi, külemküja, liba liro, yimya yimko ajungai tsüngrem meimba ta tongmelang agi angatettsüa akok. Aser iba tangatetba nung kodang taküm rangben tsüngrem nem khenyongi bendanga agütsüdir, tsüngremi kümzüktsü. Yangi tsüngrem meimbaji ayir-asangur arok-aroka süoki yia meimtetba den atishitepa jembir. Kodang tsüngrem nem taküm ajonga agütsüdir pa taochi ajanga pa/la soli-süli nungi nüchi agütsütsü aser Pa den saku küma longjemdaktsütsü.
Chichiba temetetba lenmang (A way of true knowledge – Jnana marga): Tasembuba lenmang ya tasaktiba lenmangji lir. Kechiba süra iba lenmang nung ya taküm kaji kanga sashia anemponga alitsü nüngdaker (it requires intense/rigorous ascetic practice). Aser iba lenmang ya pei sasa angutsü makok saka tesayur ka ajanga dang iba lenmang miim oji angazüker. Tatem nung iba lenmang ajanga pa/la tsüngrem den ka küma longjemdaktsür (a union with god, in other words, a realization of his/her true self as God). Tetezü, naji na masü ta angateta aruba e.g. Merenba/ Narola masü saka tsüngrem ta angatetba.
Anungji Hindu tesayuba nung item lenmang asem ajanga shi talenba nungi nüchi angur aser tsüngrem den ka küma longjemtsür.
Yoga Telemsa : Temalen shia aliba ama India nung yoga ya tar nunger mapang nungi benshia aru saka yimya ka ama tentetbajibo Sage Yajnavalkya-i mezüng tenzük. Iba sülen Patanjali-i 2nd Century BCE nung kaket zülu ka Yoga- sutra nung tatongi zülu aser iba nung ajemdaker benshitsü tenzük. Shia aruba tekümtet lenmang asem (the three margas) den yoga ya-a tekümtet lenmang ka aser iba dang ‘Raja yoga’ ta ajar. Patanjali-i ashiba agi yoga ya tekolok shisatsü tebilemba ajonga noktanga ayutsü merangba yimya ka (a method of restraining the functions of the mind). Anungji yoga yagi tekolok aser shi-azü azüoka ayur aser iba ajanga tatem nung nüchi angur. Patanjali yoga inyakyim dang astanga yoga ta ajar aser iba yoga ya tiyi-sü (eigth limbs) lemsa lir.
Iba tiyi telemsa (eigth limbs) indang tatongi rasa-a mezülutsü saka tongmelang agi yamai lemsar: i) Kechi agisa temulungjang animesüngzükdaktsür aser menentsür, item ajakji anendaktsütsü asoshi, tiyazü mejembitsü, maoyatsü, tashiyim meinyaktsü, nüktapangta meinyaktsü aser rongsen mepenbotsü indang sayur; ii) Merükmejo, mulungsü (contentment), kümdanga chi-a-jema tera agi peridaksüba (austerity), pei indang pei sasa shisadangba aser tsüngrem külemba indang sayur; iii) Temang tenokdakba (bodily posture) koba dang asana ta ajar iba agi temang tashi itdakja konta sa konta temang tera-aka marakzüi meditation asütsü indang sayur; iv) Tangu sashiba exercise (breathing) koba dang prartayama ta ajar iba ajanga temang tashi azüokba (flow of energy in the body is controlled) indang sayur; v) Tesem ka nung dang rangloka tenok tenoka bilemba (one pointed concentration or meditation); vi) Temulung nung tanela jenjang meteta shisadangba (awareness of the inner spiritual realities and contemplation upon those realities); vii) Tekolok aser shisatsü ajak ajem-ajema kümdakja pei sasa shitakba peiji kechi aji meteta akümba (realization of one’s true nature); viii) Aser tatemsa ka küma lungjemba (oneness – a form of super consciousness), yangi talenba ajonga nungi salar tabensa nüjiso anguba (a complete freedom). Patanjali yoga den ano hatha yoga ta sür ka lir koba Patanjali yoga den aisü nung sako lir. Twentieth century nungi tenzüka hatha yoga nung asana (bodily postures) ya kanga dang nüngtoko süa physical exercise ka amai amshir. Tanu iba hatha yoga ya melang-melanga yoga ta dang ajar. Tanü yoga tesayur aikati asana (bodily postures) ya Hindu jaya-jako melena engraji nungja agüja melenzüka amshidaki.
Ano item asana dak alaka yoga meditation nung yaritsü asoshi teka teniang arakzüba (gestures) tiyi (eight) lir aser ibadang ‘mudra’ ta ajar; yangi ‘asana’ den temeyong (finger) agi temaitsü balala yanglur e.g; lotus pose nung mener temeyong ana-jemtsüba (thumb) aser tetuyuba temeyong (index finger) na kilepba kongshitepber tanüngba meyong indang indanga songla-a tepi nung metaloka ayubaji Sanskrit nung Gyan mudra ta ajar. Ashiba agi iba ajanga tekolok shisatsü nung tashi tali itdaktsür, tebilemtetba aser tenok-tenoka temulung agütsüba (concentration) nung yarir ta ashir.
Anungji ‘mudra’ tesayuba nung temeyong balala amshia yoga meditation agiba ajanga lenmang aisü nung tekolok, temulungjang aser temang nung teyari agütsür. Ano ‘Surya Namaskar’ ta sür yoga ka lir koba tetezü “anü nem salem agtitsüba/anu külemba.” Iba nung ya inyakyim ajak agi ter-ana (twelve) küma lemsa lir. Iba anü nem salem agütsüba/külemba ya (surya namaskar or Sun salutation) tar nunger nungi anü nem akümtsübo aser tenüngsang agütsüba inyakyim ka lir. Kechiba süra anüi (sun) alima nung aliba taküm ajonga taküm lidaktsür. Iba surya namaskar ya ken aidang telemsa ter-anaprongla ka-ken ka-ken ta ayir. Tatishitsü ka agi: Ali nung lema aliba pakti (mat) tatem len tetsüng anapronglai kesasa tashi agutsüa nokdaker teku (chest) apua atua aser tapubang anisüngzüka yur külen tangu telongleni sa-okdang (inhale) teka anaprongla rezülen nungi mesoa atutsü aser tangu sadokdang (exhale) külemi ajurutepa teku-i aruagi sarasademba yimya nung ayubaji Pranamasana ta ajar (Prayer pose).

Yoga nükjidong : Asenoki metet yoga ajanga temang aser tekolok shisatsü anema alitsü sayur. Saka yoga nükjidongji iba kijaji masü. Kechiba süra, asana (bodily postures) balala aiba ajungaji tashi ita aser tenok-tenoka kontasa-konta yoga meditation agitsü asoshi shi temang aser tekolok shisatsü renemshitsü atema dang lir. Saka yoga nükjidongjibo kodasür shi temang talenba nungi nüji angutsü (freedom from the bondage to the body) aser tanüla tabensaba küma tsüngrem den lungjemtsü, ta asübaji lir.
Anungji, yoga meditation ajanga pei chichiba nülaji meteta arua tsüngrem den ka küma lungjemdaktsür. Hindu nunger asoshi chichiba nülaji (true self/soul) ka dang lir aser iba dangji Brahman or paraatman ta ajar (the ultimate reality/supreme spirit or the absolute). Shankara eight century Hindu tesayuri ashibaji (advaitic school of thought) Brahman dak alaka meimchir aser anüng-ali ajak nung aliba ajonga ya tiyazü (maya or illusion) ta ashir. Aser iba tangatetba ya nisung kati matong tashi, pa nüla tanen maka alima nung shi talenba nung lijen alitsü, iba dangji karmasamsara or transmigration of soul ta ajar. Anungji shi tejangraba aser tekolok shisadangba koba agisa nisung ka shi talenba nung lidaktsür, iba nung jagi pilatsü asoshi yoga ya nüngdaker.

Yoga temang asoshi tejangzük : Temalen shisemba ama, tanü asen mapang nung, Prime Minister Narendra Modi-i anir yoga kanga dang sashia benshitsü tenzükogo aser alima ajunga nung yoga tesayuri anir ‘Intemational Yoga Day’ nung meimchir meyirjangsa meyirjangi iba ya benshir. Ano iba anogo dak alaka nisung aikati yoga ya temang anema alitsü atema aser tashidak balala ajungtsü atema anogoshia benshir. Kechiyong yoga sayuri ashiba agi yoga ajanga tashidak aika nung yarir ta ashir. Aotsür Aor tamangeria aikati anogo shia Baba Ramdev den yoga pei tashidak ajungtsü mechi yoga benshiba ni ajangshia aruogo.
Yoga ajanga tajangzük agütsüba kar:
* Shi tekolok belemba (stress) nungi anisüngzük agütsür
* Tenok tenoka (concentration) mapa inyaktettsü teyari agütsür
* Blood pressure alir asoshi teyari angur
* Teberem tashidak asoshi tajung
* Temang iladaktsür
* Temang anükanüka arakzüdaktsür (flexibility)
* Yiru-yiprong nungi kümzüker
* Tango tajungba/tesademba sashitsüdaktsür
* Temulungjang aser temang nung azü junga jajadaktsür
Item dak alaka yoga kaket aika nung aser TV nung yoga sayurtemi tejangzük balala aika indang ashiba angutsü aser angashitsü. Yoga ya aerobics mesüra tanga physical exercises den balaka kechiba ta süra yoga inyakyim nung tangu sashiba aser asana (bodily postures) ya kanga dang tongtipang. Ano yoga ya temang arakzüba dang masü saka yangi tekolok (mental) aser temang anaprongla azüoka ayutsü inyakyim.

Yoga Day – NDA Govemment nükjidongji kechi ? :
Yoga day ya RSS hindutva sentong ka ta angateti. Tanü cow vigilante dang masü saka India nung tesem kar nungbo yoga vigilante-a adokogo. Anungji iba yagi angateter, yoga day ya anema alitsü tayongzükba kisüng masü saka par telong terenemba (hidden agenda) nükjidonga ka lir.
Iba ya sanskritization inyakyim ka – sanskritization tetezü, Hindu nunger jenjang makai tekübok tiya nung alir (outcaste) Hindu yimsü benshidakja temaba jenjangi todaktsübaji lir (upward mobility). Tanü Shuddhi movement aser Ghar Wapsie (reconversion through purification rite) ajanga item kesa tiya nung alirtem nem jenjang tajungba agütsüba (upper caste status by giving them the sacred thread) asenoki angur.
Yoga ajanga RSS agenda-one nation one culture (Hindu Rashtra) akangshidaktsür. India lima nung alir ajak Hindu sobaliba (culture) benshitsü aji mesüra India lima nung alitsü makok ta amokmerenba.
Yoga Day ya Narendra Modi political agenda ka lir aser iba ajanga Hindu yimsü dak amangertem vote consolidate asütsü nükjidong.
Ano Narendra Modi indang agenda kaji iba yoga day ajanga India nunger rongsen tajangzük lenmang ka bushiba (commercialization of Indian culture)

Khristan Tebilemtsü kar :
Küm asem tejanklen nungi Khristan puri yoga ya asen yimsü den apet mapet aser iba ya asen tesayuba anema asü masü, iba indang kanga sashia jembi mesüogo. Aikati ashir iba ya Hindu yimsü, anungji ya mebenshitsüla ta kaket nung aser newspaper balala nunga zülua angur.
Talisa Catholic church aser NCCI (National Council of Churches in India) ajanga govemment-i school ajak nung yoga class agitsü aser ‘Yoga Day’ amongtsü ozüng anema Prime Ministerba dangi shity züluogo.
Kesaji Mizoram Govemment-ia Yogaji ozü yimsü aser sobaliba nung mapet ta züluogo. Anungji Khristan telok aikati iba yoga compulsory süa benshidaktsüba anema nokdaker. Saka ni aibelener ka mesüra, asen nüburi aser arogoi yimjak nung, iba anema ola adokba mangashir.
Tanü India nung minority telok talisü mejungi kümogo. Tang aliba sorkar ajanga kanga dang tasa aika asateta par yimsü aser par otsü nung ajemdaker India lima yangertsü apuso-ogo. Yamai dang aonungbo kobi meli chichiba Hindu rashtra aser Hindu dharma (Hindu lima aser Hindu sobaliba) dak ajemdaker India rangben yangertsü ana nung dang lir.
Asenoki jungjunga ajidangra, tamasa parnoki school education aser school curriculum nung kongshir aser nüburi memeteti school education ajanga par yimsü tesayuba tanem tanemi lenmang aisü nung sayutsü tenzüker. Tanü asen State Govemment nunga BJP party nungiang education minister kechiba shim? Item maparen jagi sayur, ya kanga dang systematic süa BJP sorkari inyakba maparen ka. Ashiko, Nagaland govemment nung BJP candidate ka mali asübo Atal Bihari Vajpayee indang aot (ash) tu asen lima ayong nung Hindu yimsü amshia meindokla (ashiba agi Mizoram nungbo Pastori sarasademer külen ayong nung enoktsü ta ashi). Asen Naga lima nungbo asenok ajaki metet Khristan kati Hindu yimsü amshia iba aot (ash) tu indok, oda akhi subotsü semer (usual dress) oaki endok asü-asübo odanga züzüa dang doktsüla. Saka Brahmin ka ama sübotsü sübor endokji ya central govemment nungi iba directive ya agütsü asü ta kanga asükjang meronga noksa reprangogo. Iba ya sanskritization process tetenzükba kechiyong tribal kaji shiba südir süang Hindu nunger telemsa nung outcaste category nung züngshir. Anungji outcaste kati brahmin putir ka mapa meinyaktet. Yangi tongtibang tangatettsü kaji iba ya Brahmanization (Hindu yimsü agi süngdaktsüba or agizukdaktsüba) mapa ka oda Vajpayee tenüng tatemtsü ka agiba dang. Anungji tanü kesaji yoga inyakyim benshiba ajanga aser benshidaktsüba ajanga (imposed), mekümdangra memeteti meyilongi Hindu tamangba yimsü agi asen Khristan tamangba amokbangtsü ana nung dang lir ta ajiteter.

Otem : Nisung aikati yoga ya physical exercise ka dang anungji yoga benshiaka Hindu yimsü benshiba mapa masü ta jembir. Külenbo aji shidak kechiyong tanü alima aika nung yoga ya physical aser mental health asoshi dang benshiba angur. Saka kari asana, mudra aser pranamaskar ajizüka benshira ajibo Hindu yimsü benshiba asütsü kechiyong item ajungaji tamangba tamaitsü kaka lir aser ano item temaitsü (symbol) meshisadangi zübazüba amshira aji Hindu yimsü benshir ta angatetdi.
Temetettsü ka lir aser aji Hindu yimya nung yoga benshidang teti agi parnoki mantra (sarasadem) agi tenzuker aser atemer. Asenoki TV nung yoga programme reprangdang ola ka “OM’ or ‘ADM’ ta shia angashir. Iba ya kanga dang bulua amshiba mantra; au, iba dak alaka tanga mantra aika dang lir aser item rongnung mashi ka agiteta amshitsü akok. ‘OM’ ya alima metenzükdang nungi liasü aser iba ola ya tar nunger mapang nung putirtemi (seers) ang ashi. Anungji ‘OM’ ya Hindu nunger asoshi temeshi ola (sacred sound) aser tanülaren temaitsü. Par yimsü nung yoga benshidang tetenzük aser tatem nung iba ‘OM’ mesüra Sanskrit ken (mantra) tena tembanger. Anungji tamanger kati Hindu nunger yoga tesayur ka den yoga anidakteba benshira na par yimsü benshir rongnungji densemer.
Au, tanü Europe nung aser America nung yoga ya kanga dang bulua benshidaki aser temalen shia aruba amatu parnoki Hindu nunger yoga nükjidong mesüra Sanskrit mantraji mamshir. Oda parnok asoshi yogaji meditation nung yaritsü aser shi temang arakzüa asentsü yimdoka exercise agiba ajanga anema alitsü nükjidongji dang. Yamala tangatetba nung yogaji agira ni bilemer, yangji kecha tetsükdaktsü mali südi (Purely for mental and physical exercise). Yamaji asenokia asen temang anema alitsü asoshi aser concentration ajungtsü asoshi Hindu nunger temaitsü mamshii yoga exercise benshira asen asoshi-a teyari südisü ta bilemer. Asen Khristan yimsü tamangba nunga 4th century nungi yimya balala agi meditation agiba Khristan otsütem nung zülua angutsü aser ano kesa mesükbaji Khristan mystical tradition nunga angutsü. Saka itemji yoga ama masü saka parnoki Temeshi Lai ojang ka mesüra tsüngrem tenüng ka nung kontasa konta meditate asüba inyakyim ka liasü.
India nung Khrista dak amanger aser theologian karibo iba yoga benshiyim ya ajizüka Khristan tamangba yimya küma amshia arur aser aji asen Khristan inyakyim nung indigenise asüba inyakyim ka ta züngshir. Tanü parnoki yoga asana meinyaki Khrista tenüng tetshia meditate asür. Ano parnoki yoga posture nung mener – teberem indang indanga songdoka mener tangu saokdang ‘Yisu’ ta saoktsü aser kodang tangu sadokdir Khrista ta sadoktsü. Iba ya maneni asüdang, tanga tebilemtsü ajak yutsür Yisu dak dang rangloka Yisu dang bilema meditation agiba ajanga temoatsü angur. Laishibai ashir, ‘Yisu tenüng nung tashi lir’, anungji Yisu !Yisu! Yisu! ta tetshia meditate asüba nung asen Khristan taküm lenmang aisü nung temoatsü angutsü. Adangji, tanü Aor Khristania mapang apiteta yur Yisu tenüng dang bilema Pa tenüng dang tetshia meditate asütsü akok mesüra Lai tekong ka mesüra kangki nung rangloka meditate asütsü akok (single pointed meditation). Sürapangla asen tanüla jenjang tajungba asütsü amai nibo bilemer.