Yoga atema bilemra nai (Modi) yi nokdangang: Nitish Kumar

Palamu, June 19 (Agencies): June 21 nü World Yoga Day amungtsü atema Ato kilonser, Narendra Modi-i ayongzükba aija Deobarnü Bihar Chief Minister, Nitish Kumar-i Modi dang, “Nai Yoga atema süoki ia bilemra BJP-i yimsüsüba state tem nung yi nokdangang,” ta ashi.
“Yoga indang mezüng ozüngji yi nungi pilaa alitsüla, anungji nai Yoga ajungkettsü atema süoki ia bilemra, mezüngbuba nung nai yi nokdangtsüla,” ta Kumar-i ashi.
Jharkhand nung yi nokdangtsü atema takhangba agütsütsü asoshi Palamu district nung par party, Janata Dal United senden ka nung pai iba o ya jembia liasü.
Kidanger state, Jharkhand den arrtsülen yi dokan aliba ajanga Bihar nung yi nokdangba maparen ya tasak ka kümogo. Taküm April ita nung Bihar nung yi nokdangba sülen tang agi tanabenbuba Kumar-i Jharkhand nung yi anema jembir.
Kumar-i aiben state ajak nung yi nokdangtsü atema jembia arur.
June 21 nü Yoga Day mamungtsü atema Bihar sorkari lemtetba atema Kumar anema jembiba sülen tanü pai item o jembiogo.
Chief Minister Nitish Kumar-i, “Yoga ya anogo ka sentong masü saka ‘way of life’ lir,” ta ashi.
“Ato kilonseri küm kwi Yoga benshir’ar ni memetet, ajisüaka nibo iba ya küm aika benshia arur — asana, pranayama aser yoga nidran,” ta Kumar-i ashi.
“Ajisüaka Yoga indang mezüng ozüngji yi nungi pilaa alitsüla aser nai, Yoga aser yi ayokba naji külemi bener moutettsü,” ta paisa ashi.
“Narendra Modi sorkari ajakji sentong ketdangsüba ka dang kümdaktsüogo saka chichiba onük atemabo kodanga meinyaker,” ta Bihar chief minister-isa ashi.
Jharkhand nung par party-i takok ngua sorkar tashi ngura Jharkhand nunga yi khenyongi nokdangtsü, ta pai nangzük.
Nitish Kumar’er sorkari par state nung International Yoga Day mamungtsü nokdangba aija Hokolbarnü BJP Legislature Party lenir aser taoba mapang Bihar deputy chief minister, Sushil Kumar Modi-i, “Nitish-i Yoga ya Muslim nüburtem anemba ka ama mekümdaktsütsüla,” ta aija liasü.