Yoga benshitsüji pei mulung südaktsütsüla: Mizoram Angh

Aizawl, June 15 (Agencies): Bodhbarnü Mizoram Angh, Lt General Nirbhay Sharma-i, Yoga onük nung mangatettep aliba ya o lemtepba ajanga bentettsüla  aser iba ya benshitsü atema shinga mekangshitsüla saka yoga benshitsüji peii mulung südaktsütsüla, ta ashi.
State Angh, Sharma “Küm 40 dak tema ni Yoga benshia aruogo, aser iba ya temang atema kanga junger ta ni jangjaogo, ajisüaka iba ya ajanga kü tamangba yimsü tashi taitba akümtsüsa kecha mesütet,” ta pai ashi.
Yoga benshiba tetezü Hindu tamangba yimsü dangi meyipba masü, ta paisa ashi.
“Yoga benshitsü atema shinga mekangshitsüla, pei sasa mulung nungang benshidaktsütsüla,” ta Angh-i ashi.
Taruba Mongolbarnü amungtsü aliba International Yoga Day ya Healthy Mizoram Campaign tetenzüker ka südaktsüner ta shia Sharma-i, Yoga ya kanga bulua akumba cancer aser HIV/AIDS tashitak, temesepba mozü aser yi den state nung tanga lokti tebilemtsütem anema hadir ka südaktsütsüla, ta ashi.
Taküm libaliro melenshiba aser exercise ajanga Mizo lanurtem shi aser shisatsü naprongla nung taliba anema alitsü, ta paisa shisem.
Tawa state nung tongti Arogo 14-i akümba Mizoram Kohhran Hruaitute Committee (MKHC)-i, state tesem ajaklen Arogo züngsemtemi Yoga mebenshitsüla, ta sangdonga liasü.
Presbyterian Church kübok Mizoram Synod nung Senior Executive Secretary aser MKHC züngsem, Rev. Lalramliana Pachuau-i, June 2, 2016 nü Synod office nung Yoga onük benoka jembia liasü, ta metetdaktsü.
Pachuau-i ashiba agi, Yoga ya ajanga Khristan tesayuba menentsütsü akok ta Arogotemi bilemer aser MKHC nung adenba Arogotem ajak dang Arogo züngsemtem kümdanga alitsü metetdakjang, ta sangdongogo.
MKHC senden nung, Yoga ya Hindu tangatetba nung amenoka lir, aser iba ya Khristan tamangba yimsü den memeyokteptsüla ta bangjema liasü, ta paisa ashi.
“Yoga ajanga shirang karbo aneptsütsüa akok, ajisüaka Yisu Khrista-i rangben aneptsüba ama taneptsü magütsütettsü,” ta shia liasü