Yoga Day nü Om ashitsü mekangshir

New Delhi, May 25 (Agencies): World Yoga Day sentong aliba mapang ‘Om’ ta ashitsü onük nung mangatettep anendaktsütsü tebilemba nung Bodhbarnü AYUSH Minister, Shripad Naik-i, ibaji ashitsü majungshir, ta ashi.

AYUSH ministry-i, 2015 nung agiba exercise nung tajentu tila kata temelenshi mali aser yoga day nung Surya Namaskar-a malitsü, ajisüaka takümbo iba sentong ya minute 10 tali bendenloker akatsü, ta ashi.

“Om ya alima ajungalen jembiba olong ka lir. Iba olong ya tamangba yimsü dak sentaka mali. Yaküm ama iba ya yoga day shilem ka asütsü, ajisüaka ibaji kangshia ashitsü majungshir. Shirnoki ‘Om’ ta shinür, ashitsü akok. Tangartemi parnoki mulungba ashitsü akok. Ibaji parnok mulung,” ta Naik-i ashi.

Yoga day sentong nung ‘Om’ ta ashitsü atema minority kari ashishir.

“Iba exercise temzüng nung tajentu kata temelenshi malitsü. Yaküm ‘Om’ ta temzüng shilem ka liasü aser taküma shilem ka asütsü. Yaküm küm ama taküma kangshia ashitsü mebenoker,” ta AYUSH joint secretary, Anil Ganeriwala-i metetdaktsü.

Media osang tetshia Naik-i ashiba agi, tatong Tir, Hamid Ansari kinungtsü Salma-ia yoga aidang ‘Om’ ashiba nung kecha tai mali ta shiogo aser ibaji shira asen temang nung oxygen timba agiteter, ta ashi.

“Tajung kaji anemer. Yaküma ibaji benshiogo. Pei kija ajangzüktsü atema iba sentong nung shilem agitsü ni nüburtem dang mepishir. 2015 küm iba sentong nung Muslim linük 77-i shilem agiogo,” ta Naik-isa ashi.

Alima nung June 21 nü World Yoga Day amungtsü, aser ibaji kümnabuba asütsü. Ato kilonser, Narendra Modi-a Chandigarh sentong nung shilem agitsü imlar.

“Surya namaskar ya exercise tasak ka lir, kechiyong iba nung ya asans 12 lir. Yoga mongintemi akümba ludeni yangluba temzüngji tanur-tain ajak atema tapet yangluogo. Iba sentong sülen kari danga surya namaskar angazüknüra, parnoki iba exercise angazüktsü atema facility lir,” ta paisa ashi.

You must be logged in to post a comment Login