Yogi shimba ajanga ‘Hindu State’ tenzükba sayur: Fali Nariman

New Delhi, March 25 (Agencies) : Uttar Pradesh nung chief minister inyaktsü atema Aditya Nath Yogi shimbaji Hindu state tenzüker asü, ta ozüngren nung mongin nisung Fali Nariman-i Honibarnü Prime Minister Narendra Modi dang asüngdangogo.
Aditya Nath shimba maparen nung Linük Temzüng asoshi lendong tulu keta lir aser iba tasa memetetertemji yimtenren teloktem atema otongdartem mesüra suwartem dang asüstü, ta Fali Nariman-i ashi.
“Prime minister-i yamaji masüa ta-a ashitsü akok saka chief minister inyaktsü atema iba nisung shimba ajanga pai Hindu tamangba state ka kümdaktsütsü merangba kuli sayur” ta Nariman-i osangbener den jembidang ashi.
“Linük Temzüng lendongbang nung lir. UP nung takok tulu ka anguba sülen prime minister-i tuyuba nung ajemdaker putir ka chief minister inyaktsü shimogo. Iba tasa mangatetertemji yimtenren teloktem atema otongdartem mesüra tekolok meshitakertem dang asütsü” ta paisa shisem.
“Prime minister Modi ji lennir tajung ka lir aser pa dak tashi balaka lir. Ni pa ama nisung mengudang, saka pai inyakba mapa ajakbo ni magizüker” ta Nariman-isa metetdaktsü.