‘Youth Voters’ Festival’ tenzükogo

Dimapur, September 4 (TYO): ‘Youth Voters’ Festival’ nung shilem ka ama September 4, 2017 nü Sazolie College, Jotsoma nung shisatokden sentong ka agiogo.
Sentongji ‘Increasing Qualitative Participation in Terms of Ethical and Informed Voting’ omen nung ajemdaker agi aser shisalen sayurtemji Deputy Director ATI, Dr. Hovithal Sothu aser Additional Deputy Commissioner, Kohima T. L. Kiusumong Tikhir na liasü.
Iba shisatokden sentong ya Systematic Voters’ Education and Electoral Participation (SVEEP) den tsüngsü medema agi aser Dr. Hovithal-i electoral roll merüktetba aser yimtsüng kar nung nütsüng yongsük dang nungi e-roll nung alirtem tenüng teimba aliba indang onüktem lemsatep. Pa ya Clean Election campaign nung tongti shilem agir ka lir.
“Asenoki election dak sendakba maparen merüktettsü süra, sorkar dang Aadhaar card den electoral roll sendakteptsü atema ayongzüktsüla. Nagaland nung, ochimashi election maparen agi süngogo aser iba inyakyim nung public-i candidate dak tai tongloktsür aser külen candidate-i public dak tai tongloktsür. Candidate karibo sen yong vote alizükba agi lakogo saka public-i meshiba agi parnoki inyaktsüsa akümer ta shiogo” ta Dr. Hovithal-isa shisem.
Paisa lanurtem dang ochimashi mapatem anema ola adoktsü aser lenmang tajung, facility tajungba, technical aser medical rejutem lapoktsü atema takhangba agüjang, ta ayongzük.
Candidate temi nenok mesüzüktsü atema mapa balala inyaktsü saka nenoki item nungi jenbua alitsü merangang. Kaketshirtemi tim candidate shimtsü atema nübortem nem temetettsütem prokshitsü merangang aser Clean Election movement osang abenertem süang, ta Dr. Hovithal-isa metetdaktsü.
Sentong nung ADC, Kohima-ia kaketshirtem pei pei constituency nung tenüng züluoktsü atema metetdaktsü.
Kaketshirtemi social media nung pei tebilemba metetdaktsüba dang masü saka election nung vote agüja shilem agitsüla aser ibaji ajanga dang temelenshi bener arutettsü, ta paisa shisem.
Iba shisatokden sentong nung Kohima nung aliba college 8 nungi kaketshirtem aden.