YR&S Department-i Kivigho Rotokha den asüpila sentong agi

Dimapur, July 31 (TYO) : Department of Youth Resources & Sports nung Assistant Director, Kivigho Rotokha mapang tatsüka shiranger July 31, 2015 nü Dimapur nung asü aser iba asoshi Multipurpose hall A, I.G stadium Kohima nung department-i asüpila sentong ka ayongzüka agi.
Asür Kivigho Rotokha den asüpila sentong nung YRS Parliamentary Secretary, Khriehu Liezietsu, department staff aser asüku lemsateper aika aden.
Department tenüng nung Commissioner & Secretary, Menukhol John-i o jembidang, asür Kivigho ji mapa nung tenendak ketdangser ka liasü ta ashi.
Pai teti pa tajungtiba agüja inyaktsü merang aser pa alima nungi pilaa aoba ajanga Department nung teyariteper tajung ka mali kümogo, ta Menukhol John-isa ashi.
Pa Director inyakdang Kivigho nem khen nung DSO Zunheboto, YRO Zunheboto, Administrator I.G Stadium aser Assistant Director inyaktsü mapa lemzüktsü kechiyong pa kanga dang tetangshi, tenendak aser temulung lemtetba nisung ka liasü, ta taoba YR&S Director aser tang Secretary, Rural Development Department teinyakdak, Kelei Zeliang-ia metetdaktsü.
Tanü agiba sentong nung Kohima Sumi Hoho, Kohima Sumi Officers Union aser NSACS nungertemia o jembi.
Asür Kivigho Rotokha den asüpila sentong agiba sülen pa mang Zunheboto-i bener ogo.