YR&S-i Commissioner & Secy, Anenla den tepila sentong agi

Kohima, Yimpoksüi/November 01 (TYO): Mapa nungi anisüngzüker, Commissioner & Secretary, Youth Resources & Sports, Anenla S. Longchari, IAS nüngtem nung Youth Resources & Sports-i tepila sentong ka ayongzüka Mongputeni/October 31 nü Hotel Japfu, Kohima nung agiogo, ta tanü ketdangsertem osang ka ajanga metetdaktsü.
Tepila o jembidang Anenla-i, 1982 küm la Commissioner office nung join asü ta metetdaktsüba den külemi lai ajangshia arubatem bilemteta jembi.
Laisa, tesüiba anogotem nungbo inyakyim lennitsü atema telatetbatem mesüra guide books maliasü saka ATI nung dang basic training agi, ta ashi.
Laisa, official mapa inyaktsü atema lai ketdangsertem dang nungi teyari agiba aser külem tenzükertem dang nungia ateyari agiba lemsatep.
Laisa, sorkar mapa inyakertemi office nung inyakyim ajungtsüsa tensa ka yanglutsüla, kechiyong mapang timbaka office nung indoker, anungji külem tenzükertem den asenoki tajungtiba nung amalitepa inyaktsüla, ta ashi.
Kasa sentong nung Advisor Youth Resources & Sports, Er. Zale Neikha-i, mapa nungi anisüngzüker Commissioner & Secretary, Anenla S. Longchari, IAS ya ni asoshi tongti ka liasü, len sayur ka aser tetsü ka aser shisa agutsür ka mesüka liasü, ta ashi.
Paisa, la ya tongmelang, mulung lemtettsüsa, mulung atoktsüsa aser ajemaluba nisung ka lir, ta ashi.
Paisa ashiba agi, 2018 küm Aenjeti/January ita nung la Commissioner & Secretary akümba sülen lai administration inyakyim melenshi aser department-i takok tulu nguyaa liasü.
Kasa senong nung Director, Youth Resources & Sports, Akumla Chuba aser Joint Secretary, Youth Resources & Sports, Limawabang Jamir natia jembi.
Maneni NCC, Bharat Scouts & Guides, NYKs, DSOs, YROs aser Engineer Wing nungia nisung balalai o tatsütsü jembia liasü.
Iba sentong ya Deputy Director, Youth Resources & Sports, Megolhu Dolie lenniba nung agia liasü.