YSR Congress MP temi Lok Sabha nungi anenba shidi agutsü

New Delhi, Rongchii (April) 06 (Agencies): Budget senden tembangba anogo nung tanü YSR Congress nungi Lok Sabha MP pongupronglai Speaker, Sumitra Mahajan nem MP nungi anenba shidi agütsüogo.
Andhra Pradesh atema Special Category Status takhangba agütsüba dak sendakba nung parnoki MP menden nungi anener.
Parnokisa par party-i sorkar anema no-confidence motion benokaka Speaker-i ibaji magizükba atema mepelaba metetdaktsü.
YSR Congress MP ponguji- Mekapati Rajamohan Reddy, Y.V. Subba Reddy, Vara Prasadarao Velagapalli, Midhun Reddy aser Y.S. Avinash Reddy nunger lir, aser parnoki yashiyongi MP nungi anentsü atema telemtetba agiogo, ta sangdonga aliasü.
Joko MP tem jagi linük yimtiba nung aliba Andhra Bhawan nung state nem maongka balaka agüjang ta lumia akhangtsü.
YSR Congress tongti, Y.S. Jaganmohan Reddy-i Telugu Desam Party (TDP) danga par MP temi Lok Sabha nungi anenba ama anentsüla, ta tayongzükba agutsüogo.
Jaganmohan Reddy-i twitter ajanga, “Onokibo jembiba ama inyaker! YSRCP MP temi tanü menden nungi anenba shidi agutsür. Ni Chandrababu Naidu danga TDP MP tem anendaktsütsü aser Andhra Pradesh nüburtem den longjemer Andhra Pradesh atema maongka balaka akhangtsü atema ayongzüker,” ta metetdaktsü.
Metsüremi 5, 2018 nungi tenzüka YSR Congress aser TDP-i Parliament House anaprongla nung takhangba agüja arudar.
Iba takhangba onük nung TDP-i Centre nung NDA teloktep toktsüogo aser YSR Congress-i Narendra Modi sorkar anema no-confidence motion benoka liasü.