Yulia ajurutsü mepishiba agizüktsü bilemdar : UK

London, Metsüremi 31 (Agencies) : Russia nunger taoba itdangiter jala tenüng agi Yulia Skripal den ajuruteptsü atema Moscow-i mepishibaji melatsü bilemdangdagi, ta tanü Küptoknü Britain-i metetdaktsüogo.
Britain nung lia mim amshia tepsettsü merangba sülen taoba itdangiter Sergei Skripal aser par jala naji March 04 nü nungi mozü kidang mongdagi; iba tashiyim maparenji Russia nungeri inyak ta London aser parnok nungitba anüolen tsütsü aliba kintemi aitsür.
World War II tembangba sülenbo Europe nung mezüngbuba ‘chemical weapons’ amshibaji tena dak liasü aser ibaji ajanga anüolen tsütsü aliba kintem den Moscow tsükchitepa kümogo.
Yulia Skripal-i la mozü kidang lia Russia nunger officials nem la semdangdaktsüner asü masüar jangjar külenang telemtetba agitsü, ta Foreign Office-i metetdaktsü. Arishi küm 33 tain Yulia Skripal ya tangbo ‘critical care’ nungibo adokogo.
Salisbury District Hospital ajanga ashiba agi, la kanga tajungba kümdagi aser taküm mekümzüktettsü ta arendaka bilemtsü mali.
La tangbo temang tajungba kümogo ta metetdaktsüba mapang BBC osang ajanga ashiba agi, la nüchi küma aruogo aser o jembitsü akoker.
“Yulia Skripal-i aginüba ama aser international & domestic law nung ajemdaker Russia-i la semdangtsü mepishibaji onoki bilemdangdagi,” ta AFP osang den jembidang Foreign Office nungi otongdatsür kati metetdaktsü.
Arishi küm 66 tain Sergei Skripal jibo ano kanga nendaka reprangtsüsa akümer saka tamajungbabo mesüi lir ta angazüker.