Yulia Skripal mozü kidang nungi aluogo

London, Rongchii 10 (Agencies) : Yulia Skripal shiba taoba ita England lima Salisbury yimti nung lia tebu (Russia nunger taoba itdangiter) den külemi mim amshia tepsettsü merangba sülen mozükidang anepalua liasü, la mozü kidang nungi aluogo, ta tanü Sangtennü BBC aser Sky news ajanga sangdongogo.
BBC osang ajanga ashiba agi, arishi küm 33 tain Yulia Skripal-ji yashi Tentonü mozü kidang nungi yokogo aser la kümzüka alitsü akokba tesem kati anir ogo saka tebu, Sergei Skripal-jibo ano mozü kidangsa anepaludagi.
AFP osang den jembidang sorkari reprangba National Health Service (NHS) nungi otongdar kati ashiba agi, iba dak sendakba nung osangbenertem den senden ka jatepa lir.
March 4 nü mim amshia tashiyim mapa inyakba indangji Metropolitan Police-i anir bushisüngdang südagi saka parnoki iba dak sendakba nung kecha memetetdaktsü.
Taoba hopta nung Salisbury hospital nungi staff-temi Yulia Skripal indang yamai ashi ; “La anogoshia tashi taitba kümdagi aser la mozüki toktsür otettsü ta imlar.”
Tebu shiba taoba nung Russian military official ka liasü, pai Britain nunger dang par telung otem miima ayok saka tesülen linük anaprongi parnok ket nung aliba itdangitertem melentepba mapang 2010 küm nungi pa Britain lima nung lia arur. Tebu temangjia tang tajungba kümdagi ta angazüker.
Britain aser par tsütsü aliba kintemi iba tashiyim maparenji Russia nungeri inyak ta aitsür saka Russia nungeria ibaji parnoki meinyak ta nokdaker.