Yulia suitcase nung ‘Nerve Agent’ enokja liasü: Report

London, Metsüremi 16 (Agencies) : Russia nunger taoba itdangiter, Sergei Skripal shiba dak ‘military-grade nerve toxin’ mim enoktsü, ibaji lar jala Moscow yimti toktsür maodang la indang suitcase nung enokja liasü, ta tesem kar nungi lazükba osang ka Telegraph osangkaket ajanga sangdongogo.
Arishi küm 66 Skripal aser par jala Yulia (Küm 33) na ya Metsüremi 4 nü England anüolentip tsütsü Salisbury yimti nung shishidak ka kimalen menden ka nung süchia oor lia angu. Iba mapang nungi tenaji kanga mejungi mozü kidang anepaludagi.
Kiralongrartem azüoktsü merangba sepaitemi ashiba agi, Yulia o Skripal naji Metsüremi 3 nü Russia nungi tayimtsü nung London yimti tonga aru.
Telegraph osang ajangasa ashiba agi, mimji Salisbury yimti nung Skripal’er kidang lapokba süoshi, cosmetics mesüra sempetlep kar nung enokja liasü südi, ta British nunger bushisüngdangertemi temulung malem bilemdar.
Britain-i ashiba agi, mim koba agi British nunger police officer ka dak dena kongshi, iba mim dangji ‘Novichok’ ta ajar aser ibaji mezüngbuba Soviet nunger sepaitemi yanglu.
World War II sülenbo Europe lushi nung iba amala mim amshiba maparen ya tan mezüngbuba ataloker.
Iba maparen ya Moscow-i inyak ta Britain nungeri aitsür aser iba nungji ajemdaker London embassy nung lia Russia nunger diplomat metsür asemi iba mapa tenüng amer itdangiter mapa inyaker ta shia parnok dang yimti toktsür aenshitsü atema hopta ka mapang agüja lir.