Yung Aung-i aniba NSCN(K) nung Nikki Sumi C-in-C shim

Guwahati, Mongputeni (October) 22 (Agencies): Asür S S Khaplang tanük Yung Aung-i aniba National Socialist Council of Nagaland-Khaplang (NSCN-K) nung general Nikki Sumi Commander-in-Chief inyaktsü shimogo.
Nikki Sumi ya Sema Naga kin nungi lir aser Nagaland nungi Naga nunger medenra Aung-i aniba NSCN-K tejakleni moutettsü ta osang ka ajanga ashi.
Osang ajangasa ashiba agi Khango Konyak-i aniba NSCN-K dang nungi Aung-i aniba telok nung nübo teimba lir.
October 16 nü eastern Nagaland nung yimtsüng ka ajanga Khango Konyak-i Myanmar nungi India-i aru ta osang ka angazükba sülen tanü Nikki Sumi C-in-C inyaktsü shimba osang metetdaktsüogo.
Osang ajanga ashiba agi Khango Konyak ya tang Yongkhao yimtsüng nung lir aser pai ceasefire alitsü aser India sorkar den yimjung olemtep tenzüktsü atema Naga civil society den jembiteptsü bilemer.
Tawa BJP lennir Ram Madhav-i Nagaland semdangdang India sorkari NSCN Khaplang ama teloktem yimjung maparen nung shilem agitsü atema atar aser parnok aden nung dang mapang magii telemtetba agitsü, ta ashi.
Taküm August ita NSCN-K-i parnok chairman Khango Konyak atsüngdok aser Yung Aung shim.
Taküm June ita Shangnyu Shangwang Khaplang asüba sülen Khango chairman inyaktsü shima liasü saka pa atsüngdoker Yung Aung shim.
Yung Aung ya SS Khaplang ama Myanmar nung Hemi Naga nunger lir.