Yung Aung-i NSCN K ‘acting chairman’ inyaktsü shim

Dimapur, Luroi (August) 18 (Agencies): Asür Shangwang Shangyung Khaplang’er tanük Yung Aung-i NSCN (K) nung ‘acting chairman’ inyaktsü atema shimogo.
Times News Network (TNN) osang ajanga NSCN (K) Chairman Khango Konyak menden nungi anendaktsü ta metetdaktsü saka yamaji matalok ta osang angazüker.
TNN osang ajangasa Myanmar nung aliba Naga nungertemi India nung aliba Naga Chairman menden nungi atsüngdok ta ashi. Ajisüaka, iba amaji matalok aser Konyak cabinet züngsem ana den ano India tsütsü nungi Naga nungertem Taga CHQ nung lir ta osang ka ajanga ashi.
Khango Konyak menden nungi atsüngdok ta osang prokshibaji India nungeri terata adokdaktsütsü tasa atonger inyakba liasü ta osang ajangasa shisem.
NSCN (K) teloki lennir melenshitsü lemtet aser tanü chairman tasenbai menden melenzükogo aser NSCN (K) meloksai lir, ta osang ajangasa metetdaktsü. Ajisüaka, tang tashi NSCN (K) nungibo official sangdong kecha mali.
Arishi küm 45 tain Yung Aung ya Manipur University nungi Political Science nung Post Graduate ka lir. Pa ya Tangshang kin nungi lir aser pa asür Khaplang den tesentaktep tajung liasü ta osang angazüker.
Yung Aung ya China, Pakistan aser Bangladesh nung training tajung agiba nisung ka lir aser martial arts aser polo nung mongin ka lir.