Yuvraj Singh aser Hazel Keech na 2016 February nung kibong akumtsü

New Delhi, November 13 (Agencies): India nunger cricket asayar, Yuvraj Singh aser pa tedong Hazel Keech na sangküm February ita nung kibong akumtsüa akok, ta osang ka ajanga ashi.

Indian Express osang ka ajanga ashiba agi, Yuvraj aser Hazel na küm asem tejaklem metettepaka tena meimteper ita asem shi dang lir.

Taoba ita Yuvraj tetsü, Shabnam Singh-i England nung Hazel’er tsüraburtem ajurua liasü.

“Tatemsa pai tetemsü tetsür ka ajuruogo. Joko pai tembar ka nüngdaker ta ni rateta liasü. Ni pa kibong kümdaktsüner, aser pai kü dang pai tetemsütetsür ka majuru tashi kibong makümtsü ta shia liasü,” ta Yuvraj tetsüi osangbenertem dang ashi.

“Taoba ita Hazel’er tsürabur ajurutsü atema ni England-i oa liasü. Lar tsüraburtemji kanga junga amenteter aser kanga ajemaluba ajanga ni kanga aoksa. Tatemsa ozü jabasoi tetsür tetemsü ka ajuruba atema ni kanga pelar,” ta Shabnam-isa ashi.

Yuvraj tetsi melungba sülen pai Baba Ram Singh Ghanduan dang ungi temaotsü meshiogo.

Yuvi aser Hazel na Bodhbar nü Bali nung aniasüngtepogo.