YWCA-i tang mezüng North East Regional conference agiogo

Dimapur, January 19 (TYO): Tang mezüngbuba North East Regional conference January 17-18 anogotem nung Fair Haven Hall, YWCA of Shillong (Meghalaya) nung agiogo, ta tanü Dimapur YWCA Tir, Watisenla Jamir-i sangdong ka ajanga metetdaktsü.
Iba conference omenji “Women against violence” liasü.
Iba conference ayonga agiba ajanga tetsürtemi anogo aben ajangshiba timtem onük balala aika jangja aser asalentong balala ajanga item timtem bentettsü nükjidong nung iba sentong agi, ta sangdong nung shia lir.
Iba conference nung affiliate süa aliba association balala nungi züngsemtem aden aser GiF (Group in Formation) telemsa asem aden- Cluster 1- Shillong, Guwahati, Chabua aser Tezpur, Cluster 2- Aizawl, Champhai, Lunglei, Saiha aser Cluster 3- Dimapur, Mokokchung, Dimapur III aser Jorhat liasü. Iba conference nung North East nungi ajak agi nisung 35 aden.
Affiliate süa aliba associations aser GiF’s-i peipei tesem nung agiba sentong aser inyaka aruba osangtem metetdakja liasü.
January 17 nü YWCA of India National General Secretary, Vinodhini Moses-i, YWCA indang mangdangji ochi temeden atema jenjang ajak nung tetsürtem nem tashi agutsütsü asoshi lir, ta metetdaktsü.
Laisa, YWCA mission ya loktiliba-rongsenkettsüng aser yimtenren tashi amshiba ajanga takoksa angur tetsürtem yaritsü atema lir, ta ashi.
Kasa anogo nung YWCA of India Asst. National General Secretary, Kalpana David-i YWCA indang putiotsü metetdakja liasü.
January 18 nü Vinodhini Moses-i, aiür chanutem aser mapa inyaker tetsürtem kümzüka alitsü atema hostel facilities agutsütsü iba denji külemi YWCA telatetbatem benshitsü metetdakja liasü.
Sentong nungsa 2018-2022 kümtem atema YWCA sentongtem metetdaktsü.