YWCA Mkgi COVID-19 anema raraba nung shilem agir

YWCA Mokokchung-i achayanga yangluba face mask telok balala nem angati lema agütsüdang tangokba noksa nung angur. Mokokchung, March 29, 2020.

Mokokchung, March 29 (TYO): Alima ajunga nung Covid-19 tashitak anema raraba nung nungitta aser iba tongpang raraba nung yaritepa Young Women Christian Association (YWCA) Mokokchung-ia face mask aser shiranger anepalurtem tashitak memenatsü atema sobuba PPE yangluba mapatong ka tenzüka, Mokokchung nung tongtibangtisa shirnok iba tashitak raraba nung mayang süa inyaker, item teloktem ayimjemtsü nükla yur inyaktsü meranger.
Market nung face mask ajema akümba ngua YWCA-i iba mapatong ya 14th March, 2020 nungi tenzüka inyaker. YWCA Mokokchung-i sponsored asüba Vocational Training Center den yaritepa züngsemtemi angati nübu tenlaa item nungdakba osettemji yanglu aser senotsüji YWCA züngsem kari tenla agütsü, ta osang ajanga angazüker.
Tang tashi nung parnoki yaria alirtemji; Mokokchung CMO staff, district administration, police, osangzülurtem (media), Fazl Ali College nung Hand Sanitizer Project nung inyaker volunteer-tem, civil hospital (IMDH), MMC staff, Longjang PHC, Covid-19 Task Force Tongdentsuyong ward-tem lir. Iba den repsema medical fraternity den angatettepa YWCA-i Aongza Youth Organization den külem sür yaritepa oset tajung amshia yangluba PPE set kar renemtsüogo, ta angazüker.
Iba osangbeneri YWCA tir, Temjensangla Pongener den telephone ajanga jembidang, YWCA-i iba mapa ya tongtibangsa temeim, aria bilem aser teimla osang sangdongtsü nükjidong nung inyakba lir. Iba den külemi Christian tesayuba nung aliba ama ajaki asen lokti asoshi peii akok nung yariteptsü ayongzüker, ta lai ashi. Iba mapang nung tamakoktemji lenmang aisü nung alitsü akok saka tajungren bilema asenoki inyakdi süra lenmang aika lir aser ibaji ajanga nungdakbapur asoshibo teyari tulu asütsü, ta laisa shisem.