YWOKU-i mezüngbuba Children’s Cultural Camp ayongzük

Kohima, October 10 (TYO) : Yimchungrü Women Organisation Kohima Unit (YWOKU)-i Yimchungrü Union Kohima den yaritepa mezüngbuba Children’s Cultural Camp ayongzüka agi.
Iba sentongji Bharat Scouts & Guide Training Centre, Nerehema nung agi aser tetushi süa jaokerji Assistant Commandant 10th NAP (IR) Batallion, K. Soriso liasü.
K. Soriso-i o jembidang pei indang sobaliba metettsü aser wazüka ayutsü ayongzük. “Sobaliba aser yimyayimpongji nisung ka indang maitsü lir aser taküm nung tongtipang. Ano asenoki pei oshi metettsüla” ta pai ashi.
Soriso-isa, alima ainba aser akhi yimyayimpong tsüngda seret odanga asenoki alitsüla ta ashi.
“Asen oboula nunger mapang mangko agiba yimyaji asenoki toktsütsüla saka ano parnoki meranga inyakba, ochishiba aser tain akhümtsübuba yimya tajungtembo asenoki maneni amshitsüla” ta pai ayongzük.
Children’s Cultural Camp ya tanurtem dang sobaliba aser yimyatsüyatem sayutsü atema ayongzükba lir, ta YWOKU President, Tansola-i ashi.
Sentong nung Agriculture Department Deputy Director, Showuba, Yimchungrü Union Kohima President Kejingkhum aser Amenla Hanji nungertemia tajungshi o jembi.
Sentong nung mendenji Assistant Cultural Secretary YWOKU Ruthsan liasü, Associate Pastor (Women) YBBK, Yinsola-i temoatsü meshia sarasadem, YWOKU Cultural Secretary Hekamla-i anküp tepela o jembi aser YBBK Pastor Longri Nungti-i tenüngsang agüja sarasadem.