Zakinthos asetkong anasa rong ka nungi aayanger 117 kümzük

Athens, July 12 (Agencies): Greece anüolen aliba Zakinthos asetkong anasa ayanger rong ka nungi parnok aayanger 117 kümzüogo, ta Greece nung tzüküm anüker kati ashi.
Rong lendong indang osang phone ajanga sangoktsüba sülen Greece ketdangsertemi rong nung alirtem kümzüktsü asoshi operation tenzük. Ionian tzüyim nung aliba Zakinthos asetkong anüolen tsütsü sepai indang tayimtsü ka ajanga rongji mezüng angu, ta tzüküm anüksang jagi ashi.
Ajisüaka lendongji kechi agi adokar ibajibo ano mejangjateti lir.
Lendong atalokba rong nung alirtemji tekümzüker rong ka amshia anasa aliba rong ‘Island Princess’ nung belenok aser iba rongji Deobar nikongdang tzüküm arua atongtsü.
Tang tashi nung aayanger meyirjang aika Greece nung arua lir. Item aayangertem ya timba ka Turkey ajanga arua Aegean asetkong nung lir koba ajanga yangji aliba ketdangsertem kanga süngmangtepa koma ang mesüi akümer.
Teyariteperi ashiba agi, iba tebilemtsü nung Greece-i Europe linüktem nungi teyari agitsüla.