Zakir tasüba agi merenshitsü obendang agütsü

Nagaon, Rongjui/September 7 (Agencies): Assam, Nagaon district kübok Batatdroba tesem nung tetsür ka dak tashiyim agi shi nung medemer tepseta toktsüba ken o dak sendakba nung ajak asoshi tatishitsü ka küma, aija alisang tasüba agi merenshitsü asoshi Nagaon Sessions Court-i Rogonü obendang agütsüogo.
Iba ken o nung aija alirtem rongnung tongtiba Zakir Hussain ya arishi küm 13 tain tetsür chanu ka shi nung tashiyim agi medemba sülen kerosene shilokja rongdaktsüba atema tepuokdak yua liasü.
Iba tashiyim mapa ya Zakir aser pa den külemi tebur chanu anati Dhanibheti Lalunggaon tesem nung Metsüremi/March 23 nü inyak.
POSCO kübok tetsür chanu ka den tashiyim agi shi nung medemba atema Zakir taküm tepeyong tepuokdak ayutsü asoshi obendang agütsü. Maneni pai la tepsetba atema o bendang balaka ajanga pa tasüba agi merenshitsü asoshi obendang agütsüogo.
Zakir ya Nagaon district and sessions judge-i Sangtennü tepuokdak ayutsü asoshi obendang agütsü aser Rogonü pa aibelen asoshi obendang agütsütsü lemteta ayu.
Kasa mapang nung Zakir tebu, tetsü aser pa tenu kinungbo nunger tai mali ta obendang agütsü, shirnok iba ken o nung aija liasü.