Zapami nung International Women’s Day among

Kohima, Metsüremi/March 10 (TYO): VLO aser SHG Zapami teyari nung Zapami Village Women Society puri Zapami yimdak March 08, 2020 nü theme “I am Generation Equality: Realizing Women’s Rights” omen nung ajemdaker International Women’s Day monga liasü.
Iba sentong nung Wete-u Wetsah , Pastor Calvary Baptist Church Pfutsero Town ajanga o jembi.
Alima ajunga den külemi Zapami Women Society ajanga iba anogomong amongtsü aser loktiliba nung tetsürtem temeden jangjashitsü asoshi sentong tajung yangluba atema lai tenüngsang agütsü.
Tetsür aser tebur tsüngda nung Yisu-i apu ala ta asenoki Temeshi Lai nungi angazüka lir, ta lai ashi. Lokti ka renloktsü aser lenla ajak nung aintsü asoshi tetsür-tebur temeden kasa alitsü nüngdaker, ta Wete-u-isa ashi.
Loktiliba nung tetsür nem temeden agütsüba ajanga dang tesem ajungalen terenlok aliba aser tekeraba nung ainba asenoki ajiteter. Saka tetsür nem temeden ajunga agütsütsü asoshi ano mapa aika lir, ta laisa ashi aser sentong nung dena aliba tetsürtem aser yimtsüng lenirtem dang tetsür-tebur temeden maneni ajungkettsü ayongzüka liasü.
Iba sentong ya Lhitewe-u Wetsah, Women VDB Secretary Zapami lenisüba kübok agi aser Zewekha Wetsah, VCC ajanga lokti den tayongzükba o jembi. Maneni VLO Zapami mendenpuba, Melhite-u Khutso-i tepela o jembi. Iba sentong nung nisung 200 shi dena liasü.