Zayn Malik-i Lorui India nung shilem agitsü

Aami (June) 2, 2018 (Agencies): British-Pakistani kentener Zayn Malik-i Luroi (Aug) India nung yimti kar nung kentenba sentong nung shilem agitsü renema lir.
“Pa kentenba sentong Mumbai nung Luroi (Aug) 3 nü nungi tenzüktsü aser iba sülen Kolkata, Hyderabad aser Delhi nung shilem agitsü. Onoki Nepal nunga kentenba sentong ka ayongzüktsüba atema sentong lir,” ta JPR Events, Chief Operating Officer, Vishal Pandey-i IANS sang ashi.
2010 küm X Factor nung shilem agiba sülen Zyan nüngtugu aküm. One Direction den külemi What makes you beautiful, Little things aser Live while we’re young nunger amala nüngtugu ken tem atenba sülen 2015 küm spotlight nungi pilaa alitsü atema par kentenba telok doktsü.
“Ni One Direction pur India nung shilem agidaktsütsü atema meranga liasü, saka parnok mazüng,” ta JPR events, Director, Sunil Hamal-i ashi. JPR events pur aser Blot Canvas PR kibur Apar Mathur nunger senteper iba sentong ya ayongzüker.
“Zyan sapurtem yangi aika lir anungji pa India-i anir arutsü telemtetba agi. Ni Liam Payne (1D nung külem kentener). Ni Liam Payne aser Zayn na mejangjateti tera mangmanga liasü,” ta paisa ashi.
One Direction toktsüba sülen Zayn-i pa indang ken mezüngbuba ‘Pillowtalk’ 2016 küm saya. Zayn-isa India nunger nüngtugu kentener Kailash Kher indang nüngtugu ken Teri deewani aser Allah ke bande nunger cover versions yangluogo.
Taküm küm tetenzüklen Zyan-i A.R. Rahman den ken ka nung longjemer inyaktsü jangraba lemsatepa liasü.
Maneni pa indang ken tasenba Metsüremi (May) nung RCA Records ajanga sayaba dena ajaki kanga junga agizükogo.
Tawa Zayn Malik aser supermodel Gigi Hadid na pilaba indang osang balala ajanga angazükogo. Tena 2015 küm nungi medem tenzük aser yakta dang Industry nung kanga nüngtugu aküm.