Zeliangrong Baudi (AMN)-i NSCN-IM telemtetba magizüker

Dimapur, Metsüremi (March) 31 (Agencies): NSCN (IM)-i Zeliangrong loksar kin balala asem lemsatsüba atema tebilemtsü abener ta Zeliangrong Baudi (Assam, Manipur and Nagaland)-i Küptoknü (Honibar) metetdaktsü.
Metsüremi (March) 23, 2018 nü Camp Hebron nung NSCN(IM) indang tatar hoho (parliament) senden ka amendang Zeme, Liangmai aser Rongmei temji kin balala asütsü atema telemtetba ka agi.
NSCN-IM-i shinga den-a asüngdangya mesüi telemtetba agiba tebilemtsü lemsateptsü atema Rongchii (April) 3, 2018 nü Jalukie nung senden ka amentsü jateper, ta Zeliangrong Baudi (Assam, Manipur and Nagaland)-i sangdong ka nung metetdaktsü.
Iba senden nung Zeliangrong civil organizations, lokti lennirtem, yimsüsürtem, sorkar ketdangsertem, shisashirtem, tazüngertem, tamangba tsütsü lennirtem, tetsür lennirtem, village council züngsemtem/gaon burhas, lanur aser kaketshir lennir ajak arua adentsü metetdaktsür, ta parnokisa ashi.
Ano külen, Zeliangrong Baudi, Manipur-ia anogo ana tejakdang NSCN (IM)-i Zeliangrong loksatsüba atema khukua aitsür ta metetdaktsüogo.
NSCN (IM)-i tim masüba mapang ka nung aser shisa makai iba telemtetba agiogo. NSCN(IM)-i Zeliangrong nunger mesüra lennirtem den asüngdangya mesüi nisung kar ajangzükdaktsütsü atema dang iba telemtetba agiogo. Naga nunger ajaki Naga yimten latettsü atema kanga dang yongya aliba mapang ka nung NSCN (IM)-i iba amai telemsa adokdaktsüba telemtetba agitsü ta kodanga imlaa maliasü, ta ZB (M)-i metetdaktsü.
NSCN-IM Tatar Hoho-i telemtetba agibaji Zeliangrong kibong nung telemsadak adokdaktsütsü aser Zeliangrong nunger tsüngda meputep adokdaktsütsü atema dang lir. Anungji, parnoki tekaratiba nung iba telemtetba meyipa reprangshitsüla, ta parnokisa shisem.
Zeliangrong nungeri kodanga NSCN (IM) nem Zeliangrong nunger dak sendakba maparen ketdangsüa inyakdaktsütsü atema temelaba mesüra tashi agüja mali, ta ZB(M)-isa ashi.
Ajisüaka, Rongmei Naga People’s Organisation (RNPO)-ibo NSCN (I-M) dang iba telemtetba atema pelaba metetdaktsüogo.
RNPO ya Assam, Manipur aser Nagaland nung aliba Rongmei nunger asoshi tongti telok lir.
Mapang talangka kin asem ka küma lokteper Zeliangrong ta ser aruba ajanga mangatettep adokdaktsü aser kin balala ta asüba temeten ajembanga yua lir, ta RNPO-i ashi.
NSCN-IM tatar hoho-i nübortem dang masüngdangtepi iba telemtetba agi, anungji meyipa agiang ta Zeliangrong telok kari takhangba agütsüba nung tamendakdak kecha mali, ta RNPO-isa metetdaktsü.
Rongjui (September) 22, 2015 nü Dimapur nung aliba hotel ka nung Zeme, Liangmai aser Rongmei külen senden ka amendang iba telemtetba ya agia liasü, ta parnokisa shisem.