Zeliangrong Baudi Kohima-i aitsür

Dimapur, November 12 (TYO) : November 10, 2016 nü Mission Compound nung mejangjatetba nisung kari NNC Member, Zeliangrong, Kadingdai dak injang kahloktsüba aitsür, ta Zeliangrong Baudi Kohima (ZBK)-i sangdong ka nung metetdaktsü.
Iba ama tesempatsü mapa inyakba ajanga asen loktiliba nem telatetba tajung bener marutsü, saka meputep ang tali adokdaktsütsü. Naga yimten telok ajaki kati ka akhümtsübutsü aser pei adianu ama meimteptsü atema mepishir, ta Zeliangrong Baudi Kohima sangdong nung shia lir.
Pei külem adianu tepsettsü merangba mapa anema noktaker aser yimjung meimba Naga nunger ajaki aitsür, ta ZBK-isa ashi.