Zhadima Catholic Church ajanga ‘Fun with Jesus’ camp ayonga agi

Kohima, Luchii/Dec. 21 (TYO): Sts. Peter & Paul Church Zhadima nung Luchii/December 18 nungi 20, 2018 anogortem nung “Fun with Jesus” camp ka agia liasü aser iba camp nung tanur arishi küm 4 nungi 20 tsüngta parnok 96 arua dena parnok ya telok asem – St.Peter, St.Paul aser Ave Maria – lemsar munga liasü.
Iba camp tenzükba sentong nung jembiba mapang, Zhadima Catholic Union (ZCU) tir, Neipu-o Thomas-i camp nung adenertem dang Tsüngremi aginüba ama aintsü aser nüburtem tenzükba nung shilem tajung agitsü ajungshia liasü.
Anogo asem agiba sentong nung telok balala aser arishi küm balala lemsar tetoktepba agia liasü. Maneni tanurtem dang art aser craft tem yanglutsüa sayua liasü.
Iba camp tatem anogo ya Zhadima Catholic Juniors Association (ZCJA) Day liasü.
Iba camp tembangba anogo nung Parish Priest Zhadima, Rev. Fr. James ya Holy Mass nung tongti o jembir liasü aser pai tanurtem dang camp nung angazükba ama taküm liyonga aotsü ajungshi.
Catechist Pezhachülie Philip-ia tanurtem dang parnoki amangba nung akhang akhanga nokdaka kati ka akhum tsübutsü ajungshia liasü.
Iba camp ya ZCJA Night agia tembang, kong tetoktepba balala agia liasü. Item tetoktepba nung tetendangertem ya Kezienguzo Victor, Seyiekhrienuo Christina aser Neikhrietuo Albert nungertem liasü.
Mhasivonuo Roselyn aser Keneingulie Kevin nati aniba St. Peter team ajanga ica camp nung overall champion sempet ngua liasü.