Zhadima yimtsüng nung yi nokdanger

Kohima, October 6 (TYO): Zhadima Village Council den GBs, VCM aser VDB temi Nagaland Liquor Total Prohibition Act 1989 nung aliba ama Zhadima Village aser telongtet nung tesüiba küm ishika nokdanga aruba ama yi meyokdaktsütsü ta bangzünga renemogo.
August 20, 2017 nü lemtetba ama, yimtsüng/telongtet nung nisung shingai yi ayoktsü memelatsü, gari nung yi abenba merenshitsü, aser aibelenertem ozüng tapet agi merenshitsü, ta Zhadima Village Council chairman Kesovilhou Chiipuo, ZVC judicial secretary Vikhelhou Khoubve aser Zhadima VDB secretary Roko Angami nungertemi sangdong ka nung metetdaktsü.
Zhadima Village kübok khel 8 nungi GB temi shimba kilen shia tekolaktemi yimtsüng aser telongtet nung yi mayoktsü ta tenangzükba nung sign südaktsütsü. Yimtsüng nung nisung shingaia yi jemer meinprong/mepetmesü mesüra rarabangsen masütsü aser iba temzüng nung mezüng aibelenertem dang sen 1000 senchi achitsü aser tanaben aibelenra, hopta ka tepuokdak ayutsü, ta parnokisa ashi.
Iba telemtetba anema aibelenertem dang mezüng atema sen 5000 senchji, tanaben aibelenra ita ka tepuokdak ayutsü, tasemben aibelenra ita trok tepuokdak ayutsü, pezüben aibelenra küm 1 tepuokdak aser pungubenbuba nungbo tanga tapet temerenshi agütsütsü, ta sangdong nungsa metetdaktsü.