Zhaleo-i apu ponger aoba tesem semdang

Dimapur, September 30 (TYO): September 29, 2017 nü Parliamentary Secretary (MAD), Zhaleo Rio leniba nung 5 Ghaspani II A/C office ketdangpurtem aser village units den Vihokhu Village lenirtemi September 27, 2017 nü Niuland lenmang nung tzü agi ponger aoba tesem, Balijan bridge semdanga liasü, ta tanü 5 Ghaspani II A/C Tir, Seyielhoutuo Keyho-i sangdong ka nung metetdaktsü.
Iba mapang nung yimsüsürtem aser NPF party nung inyakertemi Parliamentary Secretary dang iba apu yanglushitsütsü mepishiba den külemi Vihokhu village nungi Suhoi village junction aser Seithekiema ‘C’ village nungi Old Showuba village junction tashi tang aliba gari lenmangtem yanglushitsütsü mepishi.
Ajioda Parliamentary Secretary-i state Chief Minister aser R&B minister den ibaji benoka jembitsü aser khen atema süaka teti atema süaka item ajak atemaji akokba tashi inyaktsütsü ta nangzük, ta sangdong nung shia lir.
Balijan bridge, Niuland road ajangba two lane State highway ya Niuland sub-division nung alirtem aser Nihokhu, Aghunaka aser Ralan sub-division (Wokha district) EAC administrative headquarters atema tongti lenmang ka lir.