Zhaleo Rio-i BJP lenirtem aser züngsemtem pelaa agizük

Dimapur, Tsüklai 02 (TYO): 5 Taruba election nung Ghaspani-II A/C menden nungi tokteptsü tebilemba alisang, NDPP candidate, Zhaleo Rio-i taruba election nung constituency nung pa yaritsü telemtetba agir BJP lenirtem aser züngsemtem pelaa agizükogo, ta tanü 5 Ghaspani-II A/C NDPP Press Secretary, Thejangukho Yalietsu-i sangdong ka ajanga metetdaktsü.
Iba sentong nung 5 Ghaspani-II A/C nung primary aser active BJP züngsem 200 shi dena liasü; parnok rongnung K.Nihokhe Achumi, Mandal President leniba nung Vikheli Zhimo, Mahila President; Hetoi Kiba, Yuwa President; Vihoto Zhimo, Kuhuboto unit President; Hotoshe, Ato unit President; Tohovi Zhimo, Highway area unit President aser Paogin Kuki, Kuki unit President nunger den pa yaritsü sangdonger party lenirtem aika densema liasü, ta kasa sangdong nung shia lir.
Iba sentong nung jembidang Rio-i, “Nisung ajak sabang ka nung yangi longjemogo; tang yimtenren tensa ajanga ajakji party balala nungi lir,” ta metetdaktsü.
Democray nung tim temeten aser kasa maongka alitsüla, ta shia pai party nung inyakertem dang, constituency nüburtem asoshi pei tangatetba balala yutsür longjemer inyaktsü mepishia metetdaktsü.
5 Ghaspani-II A/C nung BJP Mandal President, K.Nihokhe-i, parnoki Zhaleo Rio yaritsü atema party nungi peipei menden nungi anentsü telemtetba agi, kechiyong parnoki mangdang aliba lenir ka, aser khuret bena mapa shidak inyakba lenir ka dak metaloker, ta metetdaktsü.
Kasa sentong nung Miathou Krose, Senior founding member NDPP; Dosau Kuotsu, President, NDPP, 5 Ghaspani-II A/C, Keviyani Thepa, taoba Vice president, Central, NPF; Seyielhoutuo Keyho, taoba President, NPF, 5 Ghaspani-II A/C nunger densema BJP lenirtemi jembia liasü.
Iba sentong nung jembir aikati, Nagaland nung ochi samatsür makmakshimak aliba tensa ka nung Naga nunger rongnung tetemsüba lenirji NDPP nungi Chief Minister candidate, Neiphiu Rio lir, ta jembia liasü.