Zhaleo Rio-i Medziphema nung SDAO office tasen semzüktsü

Dimapur, December 13 (TYO): December 12, 2017 nü Municipal Affairs Parliamentary Secretary, Zhaleo Rio, IAS (Rtd)-i Medziphema nung Sub Divisional Agricultural office tasen ka semzüktsü aser nüngshilong sayaja liasü.
Sentong nung tongti tesemdanger o jembidang Rio-i, Medziphema Sub-Division atema iba anogo ya tongtibang anogo ka lir, kechiyong mapang talangka nungi nüngdaka aliba ka atalokogo, ta metetdaktsü.
Paisa, SDAO office semzükba ya terenlok süngjang ka lir aser sorkari junga inyakba temaitsü lir, ta metetdaktsü.
Medziphema ya administrative headquarters tejentiba rongnung ka lir aser iba ya agro-based crops nung amenoka lir aser tesem-a tiyongtsü ka nung lir.
Paisa nüburtem aser ketdangsertem dang tarutsü atema aser timba züsentettsü atema organic jenjang tajungba kümdaktsütsü aser metsühjang tajungba amshitsü ajungshia liasü.
SDAO tasenba atema pai sorkar aser department na dang pelaba metetdaktsüba den külemi, iba ya ajanga yimtsüng aser jila tesem naprong ajangzüktsü, ta shisem.
Iba sentong ya ADC Medziphema Vikweno Chale, NCS leniba nung agi; Director Agriculture, Helie Rüpreo-i establishment indang osang tatsüka metetdaktsü, Akhoto Kuotsu President, Mechü Krotho-ia o tatsüka jembi aser Dimapur DAO, Atoi Sema-i tepela anküp o jembia liasü.