Ziekezou FC temaba jenjang nung lir

Kohima Football League

Kohima, August 26 (TYO): Substitute menden nungi aita Vilhoubeituo Yhome-i goal ana agütsüba ajanga Ziekezou FC ya Kohima Town Club-i ayongba Kohima Football League round trokbuba tatem nung temaba jenjangi tuogo.
Iba asayamung jenjang tanabuba nung aliba telok, Ziekezou FC-i temaba jenjang nung alir, Khriekesa FC madak 2-0 agi kokteta par telok ya temaba jenjangi atu.
Ziekezou FC ya asaya pezü nung takok angu aser asaya ana nung tamakok alua points 12 nguteta temaba jenjangi atu aser Khriekesa FC ya taoba round pongu tashi temaba jenjang nung lia aru, saka tanü tamakok anguba ajanga points 10 nung jenjang pezübubai luogo.
Ziekezou FC-i iba asaya amokbanga tenzükaka maongka tajung ana nung goal kata magütsütet, saka minute 34buba nung Vilhoubeituo Yhome-i goal ka agüja mezüng asaya tembang.
Kasa asaya tanabuba shilem tenzükba sülena Khriekesa FC-i goal ka ya mükepzükteti lia minute 77buba nung Yhome-isa Ziekezou FC atema tanabuba goal agütsü.
Ziekezou FC atema tanabuba goal ya Yhome-i meta talang nungi metsü saka goal post nung ondaker tanaben adokba mapang pai-sa metsüoktsü.
Khriekesa FC nungi Neiphrezolie nem asaya tenzüker minute 52buba nung temerenshi agütsü aser Ziekezou telok nungi Vinoka Sumi aser Hitova na nem minute 65buba aser 71buba nung yellow card kaka agütsü.
August 28 nü asayatsüpurtem
(Round 7):
Nagabazar FC vs Khriekesa FC @ 3:00 PM