Ziekezou-i, Twenty-XI koka maneni temaba jenjang nung lir

Ziekezou FC aser Twenty-XI nungi asayartem goal bang nung ball raktepba noksa nung angur.

Kohima, Luroi/August 2 (TYO): Kohima Football League-2 nung taküm mezüng shilem agiba telok Sechü-Zubza Football Club pur maneni temaba jenjang nung lir. Iba asayamung ya Kohima Town Club-i ayongzüka Kohima Local Ground nung tang asayadar.
Round pongububa tembangba sülen Sechü-Zubza pur maneni mezüngbuba jenjang nung lir. Parnok tang tashi nung khen danga tamakok ngua mali aser asaya pongu nung asem akokba den ana draw asüba sülen tang parnoki point 11 nguteta lir.
Parnok sülen tanabuba jenjang nung Defending champions, Ziekezou SC pur lir. Parnoki tang tashi nung point 7 nguteta goal difference agi Twenty-XI FC pur jakdang lir, shirnokia point 7 nguteta lir.
Taoba asayamung tanabuba jenjang nung tembangba telok New Market FC puri point 6 nguteta jenjang pezübuba nung lir aser goal difference agi parnok Khriekesa FC, Meriema jangdang lir. Parnok sülen Vanguard FC Tseminyu pur jenjang trokbuba (5 point) aser United 16 Lerie (4 point) pur tenetbuba nung lir.
Kasa mapang tanü asaya nung Punürü-i goal ana idaktsüba ajanga defending champions Ziekezou puri Twenty-XI madak 2-1 agi takok nguogo.
Kanga dang toktepa asayaba asaya ka nung telok anapronglai asaya mezüngbuba shilem nung goal magütsüteti liasü.
Ajisüaka asaya tanabuba shilem tenzüker minute 10buba nung Punürü (10)-i Ziekezou pur atema mezüngbuba goal idaktsü. Iba sülen minute 63buba nung parnoki maneni goal tanabuba idaktsür lila saka Vilhoubeituo Yhome (15)-i iba maongka magitet.
Minute 65buba nung Ziekezou defender kati D’box nung hand-ball menaba sülen referee-i Twenty-XI pur nem penalty metsütsü asoshi maongka agütsü, ajisüaka Visekhol Mekro (26)-i metsüba ball goal keeper Keneiphrezo Kire-i kangajunga nokdang.
Iba sülen ano maneni minute 76buba nung handball ka menaba sülen penalty agütsübabo Kire-i menokdangtet. Iba penalty ya Kelengoto James Kechii (21)-i idakja goal kasasa aküm. Iba sülen minute pezü dang lir Punürü-i tanabuba goal agüja Ziekezou puri asaya kokogo.
Luroi/August 3 nü asaya yamai alitsü:
United 16 FC vs Sechü-Zubza FC@ 2PM