Zika anema raratsü asoshi White House-i sen bn 1.8 nungdaker

Washington, February 09 (Agencies): Tang North aser South America na nung kanga sashia pokteta aliba Zika mesen anema raratsü asoshi sorkar emergency senpong nungi dollar sen 1.8 agütsütsü olen ka US Tir, Barack Obama-i US Congress den benokogo.

Zika mesen indang research agitsü, iba meseni bener arutsüba tashidak aneptsütsü mozü mora yanglutsü, iba tashidak aketer nisungtem putetsü tesemtem tentettsü aser Zika mesen o microcephaly ta ajaba kinü tanur tekolak temang den meputepi uludaktsüba aser tekolok meshidaki kümdaktsüba tashidak na sendaktepa ali asü mali iba osang bushitsü maparen nung tan Tir Obama-i benokba senji amshitsü ta US mozü ketdangsertemi metetdaktsüogo.

Kasa senji amshia, merila kanga sashia poktetba ajemtsütsü aser sen peria malir mashishia alir tetsürtem nem senostü aser mozü mora teyari agütsütsü densema, Zika mesen prokshibaren ajemtsütsü maparen nunga amshitettsü White House-ia metetdaktsüogo.

Taoba ita 2 tsüngda nung bendanglen senzüsenpongba US senso 50 shi dak Zika mesen den sentakba tashidak keta aliba osang bushitetba osang ka US Centers for Disease Control & Prevention (CDCP) tentetia metetdaktsüogo.

Aedes aegypti merilai metepba ajanga Zika tashidak ya meimchir rong nung prokshiba osang bushiteta lir.

Ano, tebur o tetsür na metemba ajanga iba tashidak ya prokshiba osang ka researcher-temisa metetdaktsüogo.

Zika tashidak menazüker nisung noklang nung shilem 80-i timtem tulu majurur saka tawa Latin America aser Caribbean na nung Zika mesen poktetshiba mapang nung microcephaly tashikdak aketba kinü tanur jenti asoba osang bushitetba sülen iba tashidak ajanga microcephaly timtemji bener arutsür akok ta research-temi bilema, research agi tenzükogo.

“Zika mesen indang research kanga junga agitsüla aser iba tashidak prokshitsüren akok tashi ajemtsütsü merangtsüji kanga dang tongtipang,” ta White House-i nenshia ashi.

Ano külen, Zika tashidak menazükba temaitsü pei temang nung mebushitet aka, Zika pokteta aliba linüktem semdangertem talisa, tetsürtemi pei temang tendangtsü tekümdangtsü olen ka CDCP nung deputy director, Anne Schuchat-ia metetdaktsüogo.