Zika tashidak atema India sorkar sangdong

India Union sorkari America linüktem nung pokteta aliba Zika virus atema tekümdangtsü osang ka February 3, 2016 nü metetdaktsüogo.
World Health Organisation (WHO) ajanga nüburtem kümdangtsü metetdaktsüba sülen India Union Health Ministry ajanga asenok linük nunga nenshia tekümdangtsü metetdaktsüogo.
Delhi nung National Centre for Disease Control (NCDC) teloki linük balala nung Zika tashidak pokteta aliba tesemtemji meteta alitsü atema bushisüngdang asütsü aser talisa asen linük nunga temang mazüngi alir tetsürtem/mashisa ajak Zika tashidak pokteta aliba linüktemi maotsü tetuyuba agütsüogo.
International Airports aser Port ajak nung Zika tashidak sangdonga noksa den tekümdangtsü ozülu balala zülua ayutsü aser kar dang iba tashidak keter asen linük telungi aitra item nisungtemji tapet teyari agütsütsü atema mozü teperi yua alitsü.
Tanga linüktem nungi Zika tashidak keter kar danga asen linük telungi aitra parnoki customs dang metetdaktsütsü tetuyuba agütsüogo.
Senzüsempongertem shirnoksa iba tashidak pokteta aliba tesemi aotsüsa kümdir, pei sasa kümdanga senzütsüla aser talisa anüngdang merlai (mosquito) memetepdaktsütsüla.
Rapid Response Teams (RRT) den microbiologist, epidemiologist aser medical specialist tem team tentettsü.
Tang tashi nung Brazil, Bolivia, Barbados aser Columbia linüktem nung Zika tashidak pokteta aliba osang jangjaogo. Item linüktem rongnung Brazil linük nungsa timtiba iba tashidak agi tonga lir aser nisung 3,670 dak ano temulung melemteti tendangdar. Aji oda süaka, tang tashi India nungbo iba tashidak agi atonger ka dang puteta mali ta metetdaktsüogo.
Zika tashidak ya ‘Aedes aegypti’ ta ajaba merla ajanga proker. Iba tashidak ya Dengue, Chikungunya aser Yellow Fever tashidak den tera mesüktepba lir. Iba Zika tashidak nüngja ya 1947 küm Uganda linük Zika aremmin (Zika Forest) nungi agizüka iba nüngja jatet.
Zika tashidak ya nisung ka nungi ka ta menatepa aoba tashidak masü saka talisa anüngdang Aedes aegypti ta ajaba merla jagi Zika tashidak aketer dak meteper ano tanaben iba merla jagi nisung kar dak meteper aser iba ajanga Zika ya prokshia ayimsünga aor.
Zika tashitak agi shirangdang tekolak menetsü, teloktep aser tetsü agi angotsü, terara shiranga aittsü, teküp nung komo tila adoka mesakba aser tenük merema mesaktsü.
Tang tashi nungbo iba tashidak nokdangtettsüsa kanga jungabo mozü nguteta mali, anungji merlai memetepdaktsütsüla aser ki temeket amala nung tzü atsünga aliba yimdokdaktsütsüla kechyiong iba jangi merla tali merenloker.
South aser North America linüktem nung nisung million asem nungi pezü dak Zika tashidak agi atongtsü akok ta World Health Organization (WHO)-i sangdongogo.