Zika Virus atema Centre-i Technical Group ka tentettsü tuyuogo

New Delhi, January 29 (Agencies): World Health Organisation (WHO)-i, Zika virus kanga prokshidagi aser iba tashitak ajanga India ama linüktem kongshitsü akok ta sangdongba sülen anogo ka lir Centre sorkari linük nung Zika virus prokba tensa reprangshimtsü aser surveillance system tashi itshitsü atema Technical telok ka tentettsü telemtetba agiogo.
Linük kar nung Zika virus prokba osang sangdongba sülen temaba jenjang nung senden ka menogo, iba senden tembangba sülen Health Minister JP Nadda-i, iba amaji atalok nunga ibaji koktettsüsa India renema lir, ta ashi.
Nadda-i, “Onoki iba tensa junga reprangdar aser iba tashitak prokshi nunga India kanga junga renema alitsü atema nüngdakba mera balala agidar,” ta ashi.
Iba senden nung AIIMS doctor temia shilem agia liasü.
Zika virus ya America nungbo kanga prokshidar, aser iba virus ajanga nisung million 4 shi kongshitsü akok, ta yashi WHO-i India densema alima linüktem dang tekümdangtsü sangdongogo.
Merla tapu ka, ‘Aedes Aegypti’ ajanga Zika virus belenshir, koba ajanga kinü tanurtem tekolok raksatsür ta amanger. Iba merla ajangasa India ama tropical linüktem nung kanga buluba Dengue aser Chikungunya tashitak adokdaktsüba virus belenshir.
Zika virus ya yaküm Brazil linük nung poktet aser tangbo America nung aliba linük 24 tashi nung prokshiogo. Zika virus ya ajanga microphaly ama tekolok dak sentakba nerve timtem balala adokdaktsür ta bilemer.
Sorkar sangdong ka ajanga, “Nadda-i tang nungi tenzüka tekaraba nung technical group ka tentettsü tuyuogo. Iba tentet ajanga tanga linüktem nung Zika virus prokshiba tensa reprangdangtsü aser nüngdakba shisatsü balala agütsütsü,” ta ashi.
Tzü temerük nung poktetba Aedes merla prokshiba nokdangtsü atema Health Minister-i tongtibangsüa jembiogo.
“Iba atema nüburtem nem awareness agütsüba ajanga tongtibang shilem agitsü,” ta paisa ashi.
El Salvador, Colombia aser Ecuador ama America nung aliba linüktemibo iba tashitak ajanga timtem ajurutsü bilemja, tetsürtem dang 2018 tashi tanur mabentsü mepishiogo.