Zika virus high-risk category nung TN lir

Delhi, February 03 (Agencies): Zika virus ya dengue aser chikungunya virus prokshiba kasa merla ‘Aedes’ ajanga prokshir aser tawa senden ka amenba sülen World Health Organization (WHO)-i Zika tashidak ya alima emergency ka lir ta sangdongogo.
Tamil Nadu, Chennai nunga King Institute of Preventive Medicine-i zika virus tendangtsü atema azü samples tuzüker ita ka jungnüa atadar, saka tang tashi parnoki mangaa aliba oset matonger.
Tang tsüngsang mopung nung ajemdaker Ministry of health & family welfare-i, Tamil Nadu aser Kerala ama state tem ya iba tashitak menatsü high-risk category nung lir anungji tali kümdangtsüla ta metetdaktsüogo.
Ketdangsertemi ashiba agi, anema alibaren tsütsü junga inyakba ajanga tenüngsang anguba state Tamil Nadu nunga tang tashi zika virus tendangtsü asoshi oset mali. Iba virus ajanga nisung kangabo masür, aser iba tashitak menaba nisung pongu rongnung nisung ka dak dang temaitsütem angur, ajisüaka shisabulutsü tulutibaji- iba virus ajanga tanur tepok nung alirtem mejungi kongshitsü akok.
Iba virus yagi tanur abendak, nosem (placenta) tashi ia kinü tekolok nung timtem adokdaktsüba-microcephaly adokdaktsür ta amanger.
Hopta asem tejakklen Chennai nung King Institute-i Zika virus atema azü tendangtsü oset mangaa lir, ajisüaka tanü tashi parnok ket matonger.