Zika virus ya ‘alima emergency’ ta sangdongtsü atema WHO senden amen

Geneva, February 01 (Agencies): Hombarnü World Health Organization (WHO) nung mongintem senden ka mena Zika virus ya ‘global emergency’ ta sangdongtsü mesüra mesangdongi atatsü atema olemtepogo.
Brazil nung tanur meyirjang aika timtem keter asoba ya Zika virus ajanga lir.
Iba tashitak atema teinyaktsü meinyaker ta nisungtemi aitsüba sülen, mongintemi international action & research asoshi mapa inyaktsü olemtep.
Taoba hopta United Nations agency-i, Zika virus ya kanga sashia prokshidar aser iba ya ajanga America linüktem nung nisung million 4 tashi kongshitsüa akok, ta metetdakja liasü.
West Africa nung nisung 10,000 dak tepsetba wara, Ebola anema menur ang raraba atema aikati WHO aija liasü, aser parnoki tarutsü nungbo tajungtiba inyaktsü ta nangzüka lir.
Epidemiology, public health aser America linüktem, Europe, Asia aser Africa nung menatepba tashitak balala atema mongintem 12-i akümba committee-i telephone ajanga senden ka menogo, aser iba senden nung lemtetba osangtemji Mongolbar nikongdang metetdaktsütsü, ta WHO-i ashi.
BBC Radio den jembidang London School of Hygiene & Tropical Medicine Director aser Ebola virus co-discoverer, Peter Piot-i, “Ebola tashitak ya alima emergency ka ta sangdongtsü atema WHO-i ita pongu tashi agiba ajanga aibelena inyakogo. Tanbo tekaraba nung teinyaktsü tim inyaktsü imlar,” ta ashi.
“Parnoki iba ya public health emergency ka ta sangdongtsü ni imlar,” ta paisa shisem.
Brazil nung nisung 4,000 shi microcephaly (tanurtem tekolok meshitak asoba) aliba osang lir. Iba den health ministry-ia ibaji Zika virus ajanga ta shiogo, ajisüaka ibaji tang tashi nungbo mejangjateti lir.
Iba tashitak ya Brazil nungi proker asünung, America nung tanga linüktem nunga kinü tanur daka tekolok meshitak asoba putettsüla, ta mongintemi ashir.