Zimbabwe nung yipru ait; nisung 100 dak tema samaogo

Harare, Metsüremi/March 16 (Agencies): Tropical cyclone Idai-i Mozambique kongshiba sülen iba ajanga maneni Zimbabwe anüdoklen kongshiogo aser nisung tajemba agi 100 shi samara bushidar, ta Honibarnü local ketdangser kati ashi.
Iba yipur ajanga Mozambique arrtsü nung aliba Manicaland province nung nisung meyirejang aika dak kongshiogo aser iba ajanga tesem aika nung electricity dak kongshiba den apu tongtibang aika metsüngbangogo.
“Tang tashi nung nisung 100 dak tema samaba osang angazükogo aser parnok rongnung karbo sür alitsü ta temulung melemi bilemer,” ta Chimanimani district member of parliament Joshua Sacco-i AFP dang ashi.
Tropical cyclone Idai-i Hokolbarnü central Mozambique dak kongshia nisung 19 tepsetogo. Iba yipru ajanga linük nung Beira yimti nung aliba nütsüngyongsük million tesadangka dak kongshiogo. Beira ya linük nung yimti tulu rongnung ka lir.
Mozambique nung local ketdangsertemi ashiba agi, yipru mait tsüngda hopta peyong tzünglu kanga sashia arua liasü. Iba lendong nung tang tashi nung nisung 66 bo süogo aser nisung aika yirur aliba den nisung 17,000 shi pei aliba tesem nungi belenshir lir.
Kasa mapang nung kidanger linük Malawi nunga iba hopta tzünglu kanga sashia aruba ajanga nisung million ka dak tema dak kongshiogo aser nisung 56 bo süogo, ta sorkar sangdong ka ajanga metetdaktsü.