Zimbabwe sorkari tepuokdak puoka ayur 2,000 shi chioker

Harare, May 27 (Agencies): Zimbabwe sorkari par tepuokdak puoka ayur nisung 2,000 shi tanü, Hokolbar nü chiokogo.
Alima jenjang nung tentetba nübur temeten asoshi nokdakba tentet, Amnesty International-i ayonger külen tan tepuokdak  puoka alir nem taidok agüja parnok tepuodak nungi chioktsü osangji Zimbabwe Tir, Robert Mugabe-i tan hopta tetenzüklen metetdakja liasü.
Tan chioker rong nung arishi küm 18 tekübok tain teburtem aser taküm tepiyong tepuokdak puoktsü temerenshi agizüka alir tetsür 2 dakalaka, tepuokdak puoka alir tetsür ajunga densemba osang jangjaogo.
Ano, tashidak tulu agi shiranga alir aser küm 3 tekübok tepuokdak puoka ayutsü temerenshi angurtema tan chiokba osang angazükogo.
Ajisüaka, tan chioker rong nung nisung tepseter, tashiyim agi rakzükraktemer, linük anema inyaker aser tashiyim agi tetsür taküm raksaja aibelenertembo madenba osang jangjaogo.