Zindagi-i Pakistan sentongtem meyoktsü akok: Subhash Chandra

September 24, 2016 : Kiralongrartemi Uri amakba sülen Raj Thackeray-i aniba Maharashtra Navnirman Sena (MNS)-i Pakistan nunger TV nung sentong agir Fawad Khan aser Mahira Khan nunger dang tangsa tang India toktsür aotsü shiogo aser parnoki tashi mangara iba video tangokba anenadoktsü ta ashi.
Ano tang Zee Entertainment Enterprises (ZEEL) meyong India Hindi-Urdu entertainment television channel, Zindagi-i Pakistan nunger sentong ajak meyoki anendaktsütsü tebilemba lir.
Essel Group aser Zee Media nung mendenbuba, Subhash Chandra Goel-i, “Zindagi channel nungi Pakistan nunger sentong ajak meyoki anendaktsütsü Zee tebilemba lir aser yangji aliba TV nung sentong nung shilem agir Pakistan nungera ajak meyipa aotsüla,” ta tweet asü.
Pakistan, Egypt aser Turkey nunger sentong nokdangba mezüng channel ji Zindagi lir.
Zindagi mezüng tenzükba mapang nüngtugu sentong Zindagi Gulzar Hai, Aunn Zara aser Kaash Main Teri Beti Na Hoti tem dena tenzük. Memunui iba channel India nungeri kanga sapua akümba sülen Pakistan nunger aser India nunger sentongtem bendenlok.
Subhash Chandra Goel-i twitter ajanga iba osang sangoktsüba sülen nungi ibai kanga tongtibang tebilemtsü ka kümogo.
MNS-i, linük nung sempet tajung aketer peria yur kechiba film nung shilem agitsü atema Pakistan nungi jaoker, ta Bollywood producers aser production houses tem dangi shidi ka züluogo.