Zinedine Zidane-i Euro 2016 Official Ball sayatsüogo

Paris, November 13 (Agencies): France nunger football asayar mongin, Zinedine Zidane-i Euro 2016 asayamong indang official ball tanü Hokolbar nü sayatsüogo.
‘Beau Jeu’ ta ajaba ball-ji France nung sangküm, 2016 küm asayatsü ayongba Euro football asayamong indang group stage nung amshitsü saka final round asayatem nungbo mamshitsü lemtetba osang ka Efe osangi metetdaktsüogo.
“France linük den tapet yimya nung Germany nung tentetba sübosolemtsü yangluba telok, Adidas-i Beau Jeu ball yangluogo,” ta Zidane-i metetdaktsü.
“France wako nung amshiba anüng sentsü, temesüng aser temerem sentsü Beau Jeu ball nung nüloktsüba den külemi, takok marok temaitsü sayua taribi sentsüa ball nung nülokja ‘E U R O’ aser ‘2-0-1-6’ zülujang ajenoka lir,” ta taoba France champion, Zidane-i osang jangjashitsü.
Adidas teloki Beau Jeu ball ya ita 18 tashi agia tasa balala amshia yangluba osang ka UEFA telokia metetdaktsüogo.
Euro 2016 asayamong nung shilem agitsü teloktemi tan November ita tatemlen nungi tenzüka Beau Jeu ball ya tendanga asayatsü sentong renema lir.