Zion School Tzüdikong asayamong tembangogo

Tzüdikong, March 22 (TYO): Zion School Tzüdikong (ZST) 2016 küm shilem asayamong March 15-17 nü tashi ‘Tekaraba, taneptiba aser azük1en’ omen nung ajemdaker takok ngua mongogo.
“Tanurtemi tajungtiba nung shilem agitsü ajungshir. Saisapongtsü nung shilem agiba ajanga temang anema lidaktsür, telungjem bener arutsür aser Tsüngrem sentsüwangshidaktsür,” ta asayamong nung tongti tesemdanger, J. Chackraborty, Manager, SBI Tuli-i ajungshia ashi.
Tan asayamong nung tanurtemi pei sempet tajungtiba amshia takok tulu ngua asayaba osanga jangjaogo.
Ano külen, tan asayamong takok ngua mongtetsüsa Tzüdikong Baptist Arogo nung inyaker toklang tenzükertemi anir tenzüker aser tenzüklatem den School Eductaion Committee-i tongti shilem agiba atema pelaba olen ka ZST Headmaster-i tanü sangdong ka ajanga metetdaktsüogo.