Zlatan Ibrahimovic-i ManU kümzük; Leicester City takok angu

London, April 05 (Agencies): Zlatan Ibrahimovic asaya nungi anendaktsür aliba tanaben shilangba metetdakja Everton den Old Trafford nung asayaba nung minute 94buba nung penalty ka yoka Manchester United aser Everton na prong-i goal 1-1 agütsü.
Everton telok nungi Ashley Williams-i ‘handball’ ka menaba ajanga pa asaya matemdang tokodaktsü aser Phil Jagielka-i goal ka yoker aliba kübzüka Ibrahimovic-i iba penalty metsüoktsütet. Iba ajanga Premier League nung Manchester United asaya 20 tashi nung tamakok mongui lir.
Saka Jose Mourinho teloki par asayadak moabu nung asaya 9 tashi draw dang asüba ajanga jenjang pezübuba nung alir Manchester City dang points pezü agi tajemba lir.
Claudio Ranieri manager mapa nungi anentsüba sülen Craig Shakespeare kübok Leicester City-i goal 2-0 agi Sunderland madak takok angu aser parnok manager tasen arur asaya 6 tashi tanen makai kokyonga arudagi.
Ibrahimovic-i iba penalty yoktetba ajanga pai 2016-17 season nung goal 27 agütsütetogo aser iba ajanga Manchester United telok ya jenjang pongububa nung lir. Par telok ya Arsenal aser Everton telok dang points asem agi temaba nung lir saka United telok ya asaya ka tali asaytsü lir.
Manchester United ya Europa League nungi taruba season nung Champions League-i arutsü teyimla tuluba kümdagi.
Parnok telok ya April ita tatemlen Europa League quarter-final nung Belgian nungi aruba Anderlecht telok den anaben asayatsü aser iba asaya nung takok angur ya Europa League nung temaba jenjang atongtsü.
Asaya nungi suspend sür alisang, Ibrahimovic aser Ander Herrera-na iba asaya nung kanga junga asaya aser Paul Pogba yiruba ajanga asaya tema masayatet.
Asaya tenzüker minute 22buba nung Kevin Mirallas-i corner ka metsü aser iba ball ji Williams-i yoktet.
Premier League nung taoba season nung takok ngua aliba telok, Leicester-i Sunderland telok tsükdaktsüba ajanga par telok ya jenjang 10buba tongogo.
Substitute nungi aita asayasang, Islam Slimani-i asaya tenzüker minute 69buba nung goal mezüngbuba agütsü aser iba sülen Marc Albrighton-i pass ka agütsüba Jamie Vardy kanga junga yoktet.
George Boyd-i goal ka agütsüba ajanga Burnley teloki Stoke City madak goal 1-o agi takok angu.
M`Baye Niang aser Troy Deeney nati goal kaka agütsütetba ajanga Watford teloki West Brom madak goal 2-0 agi takok angu.